Os biólogos galegos reivindican a vacinación e rexeitan as "dúbidas" sobre esta inmunización

O Colexio oficial de Biólogos de Galicia (Cobga), ante as "reiteradas noticias" que expresan dúbidas sobre a conveniencia da vacinación contra a covid-19, reivindica este proceso de inmunización e rexeitan as dúbidas que se expresan.

"O acceso aos programas de vacinación está a ser fundamental para pór fin á pandemia de covid-19. As vacinas autorizadas son seguras e eficaces e foron avaliadas en decenas de miles de voluntarios en ensaios clínicos", apuntou o colexio.

Ademais, "todas cumpren cos requisitos científicos establecidos na lexislación sanitaria de seguridade, eficacia e calidade", incluíndo, engaden, "numerosos estudos preclínicos, antes de pasar á fase clínica".

Os estándares e rigorosidade aplicados para a autorización, engaden, "son exactamente os mesmos" que contra outras enfermidades. Foron os recursos humanos e económicos destinados a desenvolver e testar estas vacinas, así como a "capacidade de colaboración", os que marcaron "a diferenza e permitiron dispor de vacinas seguras e eficaces nun período de tempo moi curto".

Os biólogos galegos engaden o traballo previo de numerosos científicos no desenvolvemento das tecnoloxías pensadas para outras enfermidades e que finalmente se están empregando para a loita contra a covid, como é a tecnoloxía do ARN mensaxeiro, as plataformas de virus modificados ou de subunidades proteicas.

Os estudos pódense consultar nas webs das axencias de avaliación do medicamento, como a US Food and Drug Administration (www.fda.gov) ou a Axencia Europea do Medicamento (www.ema.europa.eu ). Tamén na páxina web da Organización Mundial da Saúde (www.who.int/es) pódese atopar a información máis recente sobre as novas vacúas candidatas contra a covid.

Preparación de vacinas contra a Covid na área de Pontevedra e O Salnés.. ÁREA SANITARIA DE PONTEVEDRA | Fonte: Europa Press