Ana Pontón apela á confianza e o optimismo, a pesar da "situación complexa" da covid

A portavoz nacional do BNG, Ana Pontón, publicou este xoves a súa mensaxe de fin de ano no que apela á "confianza e optimismo" dos galegos dada a crise sanitaria provocada pola covid-19 e pide "extremar a prudencia e os coidados".

"Temos por diante unha situación complexa, pero non nos desanimemos porque imos saír adiante e ímolo a facer grazas ao voso comportamento exemplar e a vosa xenerosidade. Para min é un orgullo ver como seguides afrontando esta pandemia, sodes un espello no que mirarme, un exemplo a seguir e espero estar a vosa altura", destacou a portavoz na súa mensaxe, difundido en redes sociais.

A líder nacionalista subliña ademais o esforzo do persoal do sistema público de saúde e dos investigadores e investigadoras. Ao fío disto, reclamou que Galicia "poña no centro á ciencia e o coñecemento para soster un futuro mellor".

Así mesmo, Pontón apela á confianza e ao optimismo. "O optimismo nace de todos e de todas as galegas que con gran esforzo sacan adiante os seus proxectos persoais, que sacan adiante as súas familias sen renderse; o optimismo da mocidade que loita por un futuro mellor e que ademais nos lembra que temos que coidar o planeta; a esperanza e o optimismo das mulleres que enchemos prazas e rúas porque queremos vivir nunha Galicia con igualdade; o optimismo que nace dos traballadores que nos demostran que temos un gran tecido produtivo, desas pequenas e medianas empresas que asombran cos seus proxectos innovadores", defendeu.

"En definitiva, o optimismo dunha Galicia que o ten todo para saír adiante, porque somos un pobo honesto, traballador e xeneroso. É un momento para ter confianza e optimismo porque temos todo por gañar. Feliz 2022", conclúe Ana Pontón na súa mensaxe de fin de ano.

A portavoz nacional do BNG, Ana Pontón, na XVII Asemblea Nacional do BNG, no Coliseum da Coruña, a 6 de novembro de 2021 / M. Dylan - Europa Press. / Europa Press