Traballadores de Ence acusan o Concello de Pontevedra de "roubo" por retirar pancartas contra o alcalde
O goberno local alega que carecían de permiso, non fora comunicada a súa colocación e estaban colocadas na iluminación do Nadal.
Por Europa Press / Redacción | Pontevedra | 03/01/2022 | Actualizada ás 14:27
Unha ducia de traballadores de Ence, entre os que se atopaban delegados de Comisións Obreiras, protestaron este luns ante a sede do Concello de Pontevedra polo "roubo" de varias pancartas reinvidicativas.
Segundo explicou o secretario de organización da unión comarcal de Comisións Obreiras, Xosé Luís García Pedrosa, o pasado 29 de decembro foron retiradas polo concello catro pancartas que este sindicato colocara o día anterior denunciando a suposta "represión" do alcalde cara aos traballadores de Ence.
Para García Pedrosa, trátase dunha actuación "antidemocrática" e "contra a liberdade de expresión", e engadiu que as pancartas "son propiedade de Comisións Obreiras" e teñen un custo superior a 400 euros.
"O alcalde de Pontevedra, mediante as persoas que procederon a retiralas, está a cometer un delito de roubo, polo que procederemos a presentar a correspondente denuncia", expresou o sindicalista.
Pedrosa asegurou que o alcalde, Miguel Anxo Fernández Lores, "ten un comportamento propio dun ditador que se considera por enriba do ben e do mal, actuando como un auténtico sátrapa".
Pola súa banda, a portavoz do Goberno local, Anabel Gulías, explicou que as pancartas foron retiradas porque non contaban co permiso correspondente, non se comunicou a súa colocación e, ademais, "estaban en plena iluminación do Nadal durante as festas".
"Imaxinade que todo o mundo puxese as súas pancartas onde lle peta", argumentou. "É como o mundo ao revés, os infractores convértense nos denunciantes", engadiu Gulías.
