Nervios e ganas entre os nenos galegos que reciben a vacina como "un agasallo de Reis"
Os menores acoden "máis tranquilos" ao non ser os primeiros aos que se administra a primeira dose.
Por Europa Press / Redacción | SANTIAGO DE COMPOSTELA | 04/01/2022 | Actualizada ás 12:54
Na véspera da noite de Reis e ás portas da volta ás aulas, miles de nenos galegos acoden este martes a vacinarse contra a covid en Galicia, con nervios pero tamén con ganas, co obxectivo de estar "máis protexidos" nos colexios e nas relacións coas súas familias e amigos. Así o manifestaron, en Santiago, varios pais consultados por Europa Press á entrada e á saída do 'vacunódromo' da Cidade da Cultura.
O Gaiás recibiu desde primeira hora da mañá aos menores de sete a nove anos, acompañados polos seus proxenitores, en pleno pico da sexta onda de coronavirus en Galicia e nunha fría e chuviosa xornada.
Abrigadas e con paraugas, as familias afrontaron este día "con preocupación" pero tamén "con ganas", e a "tranquilidade" que dá "a boca a boca" ao non ser os primeiros menores aos que se fornece a vacina.
Así o explicou unha coordinadora de enfermaría aos medios de comunicación presentes na Cidade da Cultura. "Veñen máis tranquilos porque o boca a boca funciona e os amigos do colexio xa lles dixeron que non pasaba nada", explicou.
Hainos máis preocupados, como unha muller que acode coa súa filla e un sobriño coa "preocupación" e receos sobre se servirá de algo, tendo en conta que nas últimas semanas o número de contaxios é elevado; pero tamén máis optimistas, como o pai que comunicou ao seu fillo esta mesma mañá que "tocaba vacina".
O "valentes" que foron os nenos tamén foi destacado por varios proxenitores, mentres algúns dos protagonistas, como Simón, Teo e Carlos, non só estaban encantados con vacinarse senón que tiñan ganas de "que lles entrevistase a televisión".
Ante as cámaras, os pequenos resaltaron o bo de que "o mundo estea máis protexido" coa vacina "para sobrevivir", e tamén para cuestións como poder estar "todos xuntos" nos recreos.
MÁIS DE 30.000 DOSES
Así as cousas, Galicia retoma este martes a vacinación contra a covid da poboación pediátrica en horario de mañá e tarde, que seguirá este mércores 5 en xornada matutina, coa administración de máis de 36.000 doses a menores de 7 a 9 anos.
Deste xeito, o proceso de inmunización da poboación de cinco a 11 anos retómase despois de recibir Galicia unha nova partida de vacinas por parte do Ministerio de Sanidade.
