Comesaña, sobre a restrición da actividade nos 14 centros de saúde: "non é de obrigado cumprimento"
Carga contra "o oportunismo" de PSdeG e BNG, que "aproveitan" a pandemia para "atacar" á sanidade.
Por Europa Press / Redacción | SANTIAGO DE COMPOSTELA | 07/01/2022 | Actualizada ás 19:07
O conselleiro de Sanidade, Julio García Comesaña, cargou este venres contra "o oportunismo" dos dous partidos da oposición, PSdeG e BNG, porque "é un clásico" que "aproveiten" a pandemia pata "atacar á sanidade pública galega".
Así respondeu en rolda de prensa ao ser preguntado polas recentes declaracións do portavoz do goberno local de Vigo, o socialista Carlos López Font, nas que afirmaba que a situación da Atención Primaria na cidade é "absolutamente intolerable" e acusaba á Xunta de non contratar proesionais para loitar contra a covid "co diñeiro que recibiu do Goberno de España precisamente para facelo".
Estas críticas prodúcense nunha semana na que 14 centros de Atención Primaria da área viguesa recibiron a indicación --non é de obrigado cumprimento, tal e como precisou Sanidade o mércores-- de só atender urxencias ou pacientes covid-19.
Respecto diso, o conselleiro recalcou que "a virulencia" desta sexta onda da pandemia "sorprendeu non aos galegos, senón a todo o mundo", polo que considerou que "o oportunismo" tanto de PSdeG como do BNG é xa "un clásico". "E no caso do Concello de Vigo é máis clásico aínda", agregou. "Sei que ao Concello de Vigo gústalle moito contratar. A nós (Xunta) tamén, pero non temos profesionais para contratar. E falar de que Galicia queda co diñeiro dos fondos covid para non contratar, iso si que é indecente", esgrimiu.
Por iso, o conselleiro animou ao portavoz do goberno vigués a "pedirlle o Ministerio de Sanidade" que "amplíe as prazas novas" de formación de médico interno residente (MIR), de modo que na próxima convocatoria os centros de saúde galegos conten con 65 profesionais máis.
"Gustaríanos moito que o señor Font e todas as persoas que aproveitan a situación para conseguir rédito político sómense a esta reivindicación e abandonen ese oportunismo", resumiu Comesaña.
"TRABALLO INMENSO" DOS CENTROS
Así mesmo, o conselleiro agradeceu o "traballo inmenso" non só dos centros de saúde da cidade olívica, senón "de todas as áreas sanitarias", e reivindicou as medidas tomadas desde o Goberno galego para "descargar" de traballo á Atención Primaria.
E é que, segundo admitiu, a repercusión da sexta onda da pandemia prodúcese neste nivel asistencial debido a "procedementos administrativos" como a tramitación das baixas, non "pola propia gravidade dos casos". "Pero iso non quita que a carga de traballo do centro de saúde sexa moi grande", recoñeceu Comesaña, xa que tamén hai baixas de persoal por covid e vacacións do Nadal, polo que hai "compañeiros que están a asumir as carteiras doutros".
Entre as medidas adoptadas respecto diso, o conselleiro tamén destacou a incorporación de médicos que xa estaban xubilados.
