Por E.P. | SANTIAGO DE COMPOSTELA | 10/01/2022 | Actualizada ás 17:10
Urxencias Sanitarias de Galicia-061 atendeu a 49 persoas debido a 37 accidentes de tráfico rexistrados o pasado fin de semana en estradas da Comunidade galega. A xornada do domingo concentrou o maior número de sinistros, con 20 incidentes. Segundo informou o 061, a Central de Coordinación recibiu entre as 15,00 horas do venres 7 de xaneiro e as 23,59 horas do domingo 9 un total de 48 chamadas en relación con accidentes de tráfico.
Os recursos sanitarios mobilizados polo 061 ascenderon a 43. En concreto, as ambulancias realizaron 39 saídas e os equipos sanitarios de Atención Primaria prestaron asistencia en catro accidentes. En 38 casos os feridos foron levados aos centros sanitarios correspondentes e en 11 ocasións recibiron atención no lugar do incidente sen necesitar traslado.
A proporción de homes e mulleres atendida ascendeu ao 50 por cento en cada caso. En canto ás idades dos feridos, o 40 por cento dos asistidos tiña entre 20 e 34 anos. A provincia da Coruña foi a que máis sinistros rexistrou durante os desprazamentos do pasado fin de semana, con 19; seguida de Pontevedra, con 10; e Lugo e Ourense con catro en cada caso.
ACCIDENTES MORTAIS
Un total de 54 persoas morreron nos 46 accidentes mortais que se produciron nas estradas españolas entre as 15 horas do xoves 23 de decembro de 2021 e as 24 horas do domingo 9 de xaneiro de 2022, período en que a Dirección Xeral de Tráfico (DGT) puxo en marcha o seu habitual dispositivo especial con motivo das vacacións de Nadal, datas nas que se produciron 17,7 millóns de desprazamentos por estrada. Deles, cinco falecidos rexistráronse en Galicia.
A cifra de falecidos este Nadal supón tres mortos menos que en 2019 --ano de referencia previo á pandemia do coronavirus declarada en 2020--. O pasado ano, Tráfico non despregou o dispositivo especial deste período como consecuencia das restricións á mobilidade que existían entón en moitas comunidades autónomas para frear o avance da enfermidade.
Dos 54 mortos en sinistros viarios deste Nadal 2021/2022 un total de 21 dos falecidos foron en sinistros ocorridos en autoestrada e autovía e 33 en vías convencionais. Ademais, 12 foron usuarios vulnerables (7 peóns, 4 motoristas e 1 ciclista).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.