A executiva do PSdeG abordará este sábado a substitución na portavocía parlamentaria de Gonzalo Caballero
Luís Álvarez, Julio Torrado, Leticia Gallego ou Begoña Rodríguez Rumbo son algúns dos nomes que están a soar.
Por Europa Press / Redacción | SANTIAGO DE COMPOSTELA | 11/01/2022 | Actualizada ás 10:34
A executiva do PSdeG, liderada por Valentín González Formoso, prevé abordar o vindeiro sábado, día 15 de xaneiro, a substitución de Gonzalo Caballero na portavocía parlamentaria co obxectivo de que outro deputado ocupe esta responsabilidade de face ao novo período de sesións.
Así o confirmaron a Europa Press fontes socialistas nun contexto no que, tras a vitoria do Valentín González Formoso nas primarias á Secretaría Xeral do PSdeG estaba pendente o cambio na portavocía do Grupo Parlamentario Socialista.
Así as cousas e ante o inicio do novo período de sesións na segunda quincena de xaneiro, a executiva do PSdeG abordará este sábado a substitución, un cargo para o que soan deputados como o lucense Luís Álvarez. Tamén se baralla a posibilidade de que sexa o aurousano Julio Torrado, a viguesa Leticia Gallego e a parlamentaria Begoña Rodríguez Rumbo.
Sobre o seu futuro tras o cambio na portavocía parlamentaria, Gonzalo Caballero, que perdeu as primarias fronte a Formoso, reiterou en varias ocasións a súa intención de cumprir as súas responsabilidades como deputado durante o que resta de lexislatura. "Sigo traballando nas miñas responsabilidades como fago habitualmente e vouno a seguir facendo onde teña esa responsabilidade e onde me corresponda estar", sostivo o luns.
