O Goberno fixa en 2'94€ o prezo máximo dos tests de antíxenos

A Comisión Interministerial de Prezos dos Medicamentos (CIMP) acordou por unanimidade que o prezo máximo de venda do test de antíxenos de autodiagnóstico da covid-19 nas farmacias será de 2,94 euros a partir deste sábado En rolda de prensa este xoves tras a reunión da CIMP, a ministra de Sanidade, Carolina Darias, explicou que o "obxectivo principal foi fixar un prezo o máis alcanzable posible, atendendo sempre ao equilibrio necesario para que o produto estea dispoñible na canle farmacéutica".

Segundo detallou Sanidade, os criterios para fixar eses 2,94 euros de prezo máximo contemplaron, entre outros, o custo que ten noutros países. "Consideráronse os prezos de venda desde xullo, cando se puxo o produto no mercado en España, ata a data. Consideramos a marxe no marco comercial das farmacias e isto, considerando que o produto está exento de IVE, deunos unha orientación", explicou.

O acordo, que se asinará hoxe mesmo e entrará en vigor este sábado, vaise a aplicar a todos o test de antíxenos de autodiagnóstico da COVID-19 que se vendan en farmacias e que foran autorizados pola Axencia Española de Medicamentos e Produtos Sanitarios (AEMPS). A restrición de prezos destes produtos foi aplaudida por boa parte do sector sanitario e farmacéutico, que ven necesaria esta medida aínda que consideran que chega "tarde", pois consideran que debería porse en marcha antes do Nadal, cando a súa demanda creceu ante o gran aumento de casos de COVID-19 pola chegada de ómicron.

Por exemplo, o Consello Xeral de Colexios Oficiais de Farmacéuticos (CGCOF) resaltou o luns, tras o anuncio da súa regulación por parte do presidente do Goberno, Pedro Sánchez, que fixar un prezo máximo "contribuirá a pór fin a unha situación denunciada reiteradamente e da que os farmacéuticos foron vítimas, ao producirse aumentos excesivos de prezo e tensións no mercado orixinadas por actores alleos á canle farmacéutica".

Os enfermeiros, por exemplo, tamén se mostraron a favor. "Non ten ningún sentido que, na situación na que nos atopamos en canto a incidencia de casos de coronavirus, o test de antíxenos sexan utilizados con fins meramente lucrativos. Desde o principio defendemos que estas probas debían realizalas preferentemente os profesionais sanitarios, pero é certo que tras liberalizarse a súa venda, fai xa máis de seis meses, non ten sentido que agora haxa quen estea a especular con iso. As desorbitadas subidas de prezos rexistradas a mediados de decembro fixeron que xa entón advertísemos da situación e pedísemos ao Goberno a súa intervención", sostivo o presidente do Consello Xeral de Enfermaría (CGE), Florentino Pérez Raia.

Instáurase así un prezo fixado por parte do Goberno que xa fora reclamado en momentos anteriores por plataformas e partidos como o BNG. O prezo supón unha baixada substancial con respecto aos entre 4 e 6 euros polos que se adoitaban vender até o momento. Con todo, os expertos manteñen dúbidas sobre a fiabilidade dos tests de antíxenos, con casos de lotes propensos, respectivamente, aos falsos positivos e falsos negativos. En calquera caso, a medida chega a Galicia nun momento en que a política de restricións de PCR da Xunta abre a porta a un consumo moito maior destas probas.