Os colexios galegos contan uns 10.000 casos activos de Covid

Os casos activos relacionados cos centros educativos galegos descenderon en máis de 3.000 positivos, ao situarse agora ao redor duns 10.000, segundo os datos facilitados este sábado polo conselleiro de Educación, Román Rodríguez, nunha visita ao museó Massó de Bueu.

Así, o pasado luns comezaron de novo as clases, tras as vacacións de Nadal, cuns 13.000 casos activos entre a comunidade educativa --alumnado, profesorado e outros traballadores--, unha comunidade que, dixo o conselleiro, está próxima ao medio milleiro de persoas en Galicia. O mércores pasado, no parte semanal que facilita a consellería, notificáronse 13.891 casos positivos e o peche de 11 aulas, o que supón o 0,13 por cento das que hai en toda Galicia.

Así as cousas, Román Rodríguez sostivo que foi un retorno ás aulas "bastante normal, tendo en conta a situación excepcional na que estamos inmersos" e destacou que se xerou "unha confianza nas familias", incrementando o proceso de vacinación de 5 a 11 anos como un dos factores.

Neste sentido, destacou que Galicia se sitúa á cabeza en porcentaxe de alumnado coa primeira dose, máis do 75 por cento, o que case duplica a media española (en torno ao 40 por cento). De feito, Galicia tamén é a primeira en lograr o fito de pasar do 70 por cento da vacinación pediátrica, e fíxoo con tres semanas de antelación fronte á data exposta polo Ministerio de Sanidade.

Román Rodríguez agradeceu a "confianza" das familias e o "gran esforzo" dos profesionais sanitarios para levar a cabo a campaña de vacinación. De feito, o colectivo menor de 11 anos actualmente non se atopa entre os tres primeiros que maior incidencia teñen en Galicia de coronavirus (que son o de 20 a 29, de 12 a 19 e de 30 a 39 anos, segundo o informe da Dirección Xeral de Saúde Pública).

Unha nai acompaña o seu fillo ás portas dun colexio | Fonte: Carlos Castro - Europa Press - Arquivo.