Dezasete denuncias por non usar máscara en Santiago esta fin de semana
E na madrugada deste pasado domingo na rúa República Arxentina foi detido o condutor dun vehículo tras dar positivo na proba de alcoholemia instruíndose dilixencias para o xulgado de garda.
Por E.P. | SANTIAGO DE COMPOSTELA | 17/01/2022 | Actualizada ás 17:26
A Policía Local de Santiago de Compostela tramitou 17 denuncias a persoas por non facer uso da máscara este pasado fin de semana na capital galega, así como outros seis polo consumo en barra no marco dos controis pola normativa Covid.
Segundo informou a Policía Local, na noite do venres ao sábado foron tramitadas dez propostas de sanción a persoa por non facer uso de máscara, seis por consumo en barra e tres en locais por non solicitar o certificado Covid.
Por outra parte, na noite do sábado ao domingo a Policía Local tramitou sete propostas de sanción a persoas por non usar máscara e, sobre as 4,10 horas do domingo, interceptou un botellón en Belvís, cuxos participantes se dispersaron ante a presenza policial.
Así mesmo, ás 4,33 horas dese mesmo día a Policía Local identificou a unha persoa por ouriñar na vía pública na Rúa Tránsito dos Gramáticos. E axentes foron mobilizados tamén pola celebración de festas en dous pisos esa madrugada.
CONDUTORES
Por outra banda, sobre as 14,40 horas do pasado venres realizouse a proba de drogas a un condutor de turismo que deu positivo e foi denunciado pola vía administrativa.
E na madrugada deste pasado domingo na rúa República Arxentina foi detido o condutor dun vehículo tras dar positivo na proba de alcoholemia e instruíronse dilixencias para o xulgado de garda.
E ás 23,15 horas deste pasado domingo na rúa Montero Ríos controlouse un vehículo cuxo condutor obtivo negativo na proba de drogas e positivo na de alcol, polo que foi denunciado.
