O Parlamento reclama ao Goberno medidas coas que paliar a subida da luz na industria do mar
A proposta do PPdeG foi aprobada por unanimidade.
Por E.P. | SANTIAGO DE COMPOSTELA | 18/01/2022 | Actualizada ás 18:30
Todo o Parlamento galego reclamou ao Goberno central medidas para paliar o impacto da subida da luz nas empresas da industria do mar. Esta proposta do PPdeG, aprobada por unanimidade na comisión de Pesca, tamén pide á Xunta que manteña as axudas destinadas ás empresas de transformación e acuicultura para proxectos de mellora de eficiencia enerxética.
O deputado popular José Manuel Balseiro avisou de que a factura da luz incrementouse en 2021 un 40 por cento en comparación con 2020, "pondo contra as cordas a economía das familias, a rendibilidade das empresas e dos autónomos, pero especialmente daquelas industrias que teñen unha alta dependencia do consumo de electricidade, como son as empresas de transformación de produtos pesqueiros e de acuicultura". Neste sentido, sostén que "a problemática da factura eléctrica acentúa a complicada situación que xa estaban a sufrir moitas destas empresas a consecuencia do impacto da pandemia".
"Nun momento no que é preciso impulsar a recuperación social e económica tras o efecto da covid-19, a falta de reacción do Goberno central para controlar o prezo da luz ameaza ás industrias do mar", advirte.
