Non se albisca fin da sexta onda da covid en Galicia: 6.600 novos contaxios e 76.000 casos activos
Os pacientes hospitalizados aumentan a 608 e a taxa de positividade sobe lixeiramente a un 18%.
Por Europa Press / Redacción | SANTIAGO DE COMPOSTELA | 19/01/2022 | Actualizada ás 11:07
A sexta onda seguen sen descender en Galicia. Os novos contaxios de Covid-19 volven aumentar en Galicia tras un par de xornadas en descenso ata os 6.619, que supoñen uns 1.900 máis, mentres que os casos activos soben aos 75.961 --uns 2.200 máis que o día anterior--. Pola súa banda, os pacientes hospitalizados por este coronavirus soben a 608 --seis máis-- e a taxa de positividade increméntase lixeiramente a un 18,7 por cento no conxunto de Galicia.
Segundo os datos actualizados na mañá deste mércores pola Consellería de Sanidade con rexistros ata as 18,00 do martes, aumentan a 55 as persoas ingresadas en UCI pola Covid-19 en Galicia --dúas máis-- e a 553 as hospitalizadas noutras unidades --catro máis--, mentres que 75.353 pacientes atópanse en seguimento no seu domicilio. Hai unha semana había un centenar de ingresados menos (508).
Por áreas sanitarias, a presión hospitalaria alíviase en tres: Ourense, Lugo e Santiago-Barbanza; mentres que aumenta nas outras catro: Vigo, A Coruña-Cee, Ferrol e Pontevedra-O Salnés. Así, na de Ourense seguen sete paciente Covid en UCI e descenden a 77 os ingresados noutras unidades --sete menos--; mentres que na de Lugo descenden a cinco o críticos --un menos-- e a 49 os hospitalizados noutras unidades --catro menos--.
Na área de Santiago e Barbanza aínda que aumentan a oito os pacientes Covid en UCI --dous máis--, descenden a 83 os ingresados noutras unidades --tres menos--. Polo seu lado, na área da Coruña e Cee aumentan a 14 os críticos --un máis-- e a 136 os ingresados noutras unidades --catro máis--; mentres que na de Vigo seguen 10 en UCI e soben a 100 os doutras unidades --oito máis--.
Nas áreas de Ferrol e Pontevedra-O Salnés seguen sen cambios en UCI, con catro e sete hospitalizados, respectivamente, mentres que aumentan a 34 --cinco máis-- e 74 --un máis-- os ingresados noutras unidades.
CASOS ACTIVOS
Os casos activos seguen en aumento no conxunto de Galicia e alcanzan os 75.961, que implican 2.273 máis que a xornada anterior, ao haber máis contaxios (6.619) que altas (4.344), ao que se engaden dous falecementos.
Por áreas sanitarias, os casos activos aumentan nas sete, coa de Vigo á cabeza (+859), seguida da da Coruña e Cee (+458), Santiago e Barbanza (+342), Pontevedra e O Salnés (+341), Lugo (+188), Ourense (+51) e Ferrol (+34). Por tanto, con máis casos activos mantense a área sanitaria de Vigo, con 20.348; seguida da da Coruña e Cee, con 15.388; Santiago e Barbanza, con 11.365; Pontevedra e O Salnés, con 8.908; Ourense, con 8.229; Lugo, con 7.745; e á cola segue a de Ferrol, con 3.978.
REPUNTAN OS CONTAXIOS
No que respecta aos novos contaxios de Covid-19 tras un par de xornadas en descenso subiron a 6.619, que constitúen 1.903 máis que os 4.716 do martes despois de comezar esta semana con 4.916.
No conxunto de Galicia nas últimas 24 horas efectuáronse 6.752 PCR --2.530 máis que a xornada anterior--, que eleva a 3.479.139 as realizadas desde o inicio da pandemia; e 9.832 test de antíxenos --uns 1.390 máis--, que suman 1.315.203. Entre ambos os tipos constitúen 16.584, o que supón unhas 3.900 probas máis feitas que o día pasado.
En canto á taxa de positividade en PCR --número de infeccións detectadas cada 100 test--, aumenta lixeiramente ata o 18,73 por cento, tras descender este martes a un 16,3%, despois de comezar esta semana nun 18,28%. Así, segue por encima do limiar do 5% que fixa a Organización Mundial da Saúde (OMS) para dar por controlada a pandemia.
