Pedro Sánchez anuncia a actualización das pensións
Será o vindeiro martes no Consello de Ministros.
Por Europa Press / Redacción | Madrid | 22/01/2022 | Actualizada ás 12:58
O presidente do Goberno central, Pedro Sánchez, anunciou este sábado nun acto en Xixón que o vindeiro martes o Consello de Ministros actualizará as pensións para o ano 2022.
"Anuncio que o vindeiro martes imos actualizar as pensións dos nosos maiores para o ano 2022", así o manifestou Sánchez durante a súa intervención nun acto do PSOE en Xixón.
Concretamente, o Goberno destinará unha partida de 6.500 millóns de euros na "dignificación" das pensións dos maiores. "A pesar das dificultades e erros, o Goberno non descansou un só día para mellorar a dignificación dos nosos maiores", dixo.
Con esta actualización, Sánchez explicou que unha pensión mínima, que no ano 2017 co modelo do Partido Popular cobraría este ano 646 euros, co novo modelo pasará a cobrar 720 euros. É dicir, 74 euros máis ao mes.
En canto ás pensións medias de viuvez, que no ano 2017 representaban 649 euros ao mes, "cobraría se seguise o sistema do PP 658 euros mensuais en 2022. Co novo modelo vai cobrar 711 euros. É dicir, 53 euros máis ao mes", continuou.
Finalmente, unha pensión media de xubilación que en 2017 puidese representar 1.071 euros co sistema do PP, "hoxe cobraría 1.085 euros e co novo modelo vai pasar a cobrar 1.182 euros. É dicir, 97 euros máis ao mes", apostilou.
Neste punto, reafirmou que o Goberno está a traballar para "mellorar" a vida dos maiores á vez que cargou contra a oposición "negacionista" que "puxeron en dúbida os obxectivos da vacinación" e "hoxe están a pór en dúbida os fondos europeos", resolveu.
