As vítimas da pandemia en Galicia elévanse a 2.881 tras seis novos falecementos
Os falecementos rexistráronse na Coruña e Ourense.
Por Europa Press / Redacción | Santiago de Compostela | 23/01/2022 | Actualizada ás 22:41
A listaxe de vítimas que deixa a pandemia da covid-19 en Galicia elevouse a 2.881 despois de que nas últimas horas falecesen outras seis persoas diagnosticadas con coronavirus.
Delas, segundo informa a Consellería de Sanidade, tres morreron mentres estaban ingresadas no Complexo Hospitalario Universitario da Coruña (CHUAC): unha muller de 96 anos e dous homes de 70 e 88.
As tres restantes faleceron na área sanitaria de Ourense-Verín-O Barco de Valdeorras: dous homes de 77 e 75 anos no Complexo Hospitalario Universitario de Ourense (CHUO) e unha muller, de 98, no seu domicilio da cidade das Burgas.
Estas seis novas vítimas, segundo precisa Sanidade, presentaban patoloxías previas.
