Tramitadas 18 denuncias en locais de Ourense por non cumprir as normas anticovid
Ademais, no marco do dispositivo de control específico do botellón, a Policía Local tramitou unha acta por infracción por falta de respecto a axentes e unha de infracción por desobediencia.
Por E.P. | OURENSE | 24/01/2022 | Actualizada ás 16:10
A Policía Local de Ourense tramitou 18 actas de denuncia en locais de hostalaría da capital ourensá por incumprir este pasado fin de semana a normativa actual no marco da pandemia pola Covid-19, entre as que se inclúen nove por non usar máscara. Segundo informou a Policía Local, entre o 21 e o 23 de xaneiro realizou tres dispositivos especiais, un deles para o control da hostalaría e horarios de peche.
Neste caso, ademais de nove actas de denuncia por non usar máscara, tramitou unha por infracción de horario, dous por permitir consumo en barra, dúas por non dispor de rexistro de clientes, dous por acceso a local sen certificado Covid e dous por fumar en local.
Por outra banda, no marco do dispositivo de control específico do botellón, a Policía Local tramitou unha acta por infracción por falta de respecto a axentes e unha de infracción por desobediencia.
ALCOL E DROGAS
En canto aos controis de alcoholemia e drogas noutro dos dispositivos, a Policía Local detectou tres positivo en alcol en condutores de 40, 43 e 48 anos nas rúas Caldas, Avenida de Buenos Aires e Praza da Lexión, denunciados pola vía xudicial.
A eles súmanse 15 positivos en alcoholemia denunciados pola vía administrativa. Tratouse de condutores de entre 21 e 51 anos, dous deles mulleres, detectados en varias rúas.
Pola súa banda, houbo cinco positivos en drogas en condutores de 41, 42, 45, 48 e 57 anos nas rúas Guizamonde, Fermín Bouza Rei, Praza da Lexión, Río Arnoia e Pardo de Cela. A iso súmase unha denuncia por perda de vixencia do permiso de conducir a un condutor de 24 anos.
A maiores, a Policía Local recibiu seis chamadas o pasado fin de semana por ruídos en vivendas, locais e vía pública.
