O Concello da Coruña promove unha nova campaña para a reutilización de envases na hostalaría

O Concello da Coruña, a través da Concellaría de Medio Ambiente, organiza desde este luns a segunda edición da campaña 'Coffee: un vaso, moitos cafés', ideada para sensibilizar á cidadanía na redución de residuos, apostando polos envases reutilizables na hostalaría e para substituír os vasos dun só uso.

Esta iniciativa contou cunha experiencia piloto entre os días 16 e 22 do pasado mes de decembro, no marco da Semana Europea para a Prevención de Residuos. Nese período, obsequiouse á clientela do cinco cafetarías colaboradoras cun vaso metálico reutilizable de café para levar.

Ao final da campaña, os establecementos adheridos á proposta da Concellaría de Medio Ambiente estimaron que o 80% dos vasos reutilizables entregados nos días nos que a proposta estivo en marcha estiveron a ser empregados de maneira habitual á hora de pedir café para levar.

Este luns, a concelleira de Medio Ambiente, Esther Fontán, asistiu, na Cidade Vella, á posta en marcha da segunda edición da campaña, que estará activa ata fin de existencias dos vasos reutilizables.