A coprodución do CDG 'Come and go' estréase este venres na Coruña
A montaxe de Helena Salgueiro adapta unha obra de Samuel Beckett
Por E.P. | A CORUÑA | 26/01/2022 | Actualizada ás 18:00
A montaxe de 'Come and go', coprodución do Centro Dramático Galego (CDG), da compañía Helena Salgueiro estréase este venres, 28 de xaneiro, na Coruña (Teatro Colón, 20,00 horas).
Esta é a primeira das seis coproducións previstas polo CDG este semestre. Trátase dunha adaptación da obra homónima de Samuel Beckett na que se axunta danza, teatro, performance, cinema en directo e instalación visual.
A entrada é gratuíta mediante invitación e pódese retirar a través da web www.ataquilla.com. Ao finalizar esta función haberá un encontro co público.
Ademais de Salgueiro, completan o elenco Iria Sobrado e Ana Gesto. O compositor xaponés Atzi Muramatsu é o autor da música orixinal e o videógrafo Marcos Montiel fará a gravación para o apoio de cinema. O colectivo técnico-artístico MOM encargouse do apoio do sensor de movemento e da iluminación.
BOLSAS
Noutra orde de cousas, a Consellería de Cultura informou, este mércores, de que cinco profesionais da cultura poderán completar os seus estudos en Estados Unidos no marco do programa de bolsas da Xunta e a comisión Fulbright.
O prazo de presentación de solicitudes estará aberto ata o 24 de marzo. Poderán optar persoas vinculadas ás áreas de artes audiovisuais, escénicas, plásticas e visuais, música, museoloxía, conservación do patrimonio e xestión cultural.
As estancias terán unha duración entre seis e 12 meses, e realizaranse entre xuño de 2022 e decembro de 2022.
