Os hostaleiros critican as "restricións perpetuas" da Xunta e piden volver abrir ao 100%
Amósanse insatisfeitos coa ampliación anunciada o mércores pola administración e apuntan que seguirán loitando até retomar todas as condicións das súas licencias.
- Novas restricións: cae o toque de 'non queda', máis horario en hostalaría e concertos con público de pé
- Aumentan os casos activos de Covid e os hospitalizados en Galicia
Por Europa Press / Redacción | SANTIAGO DE COMPOSTELA | 27/01/2022 | Actualizada ás 13:55
Os hostaleiros galegos móstrase "insatisfeitos" coas novas medidas implementadas pola Xunta en canto ao alivio de restricións para o sector, que devolven ditas limitacións a antes de Nadal, xa que seguen sen poder abrir ao 100%. Así, acordouse adiantar a ampliación do horario de hostalaría e a reapertura de barras a este fin de semana, á vez que desaparece tamén a prohibición de reunirse non convivientes entre as 3,00 e as 6,00 horas da madrugada.
O presidente da Federación Galega de Hostalaría e da Asociación de Empresarios de Hostalaría de Lugo, Cheché Real, incidiu en que "a meta do sector é poder abrir ao cento por cento" como lles permiten as súas "licenzas" de actividade. "Mentres non consigamos iso, nós non nos damos por satisfeitos. Seguimos sendo despois de dous anos o único sector ao que se lle conculcan os seus dereitos a abrir a súa empresa na forma que nos permiten as nosas licenzas", aseverou.
"Non estamos satisfeitos, e non o estaremos ata que consigamos abrir ao cento por cento tanto en aforamentos, superficie como en horarios", razoa. "Parece, pero non nos podemos fiar, que isto vai baixando (os casos activos de covid), que se chegou ao pico hai uns días e agora todo vai ser baixar e chegaremos a estabilizar este brote", subliñou.
Por iso, o hostaleiro lucense espera que en "entre 15 e 20 días" deberían "estar abertos ao cento por cento en canto a horarios e tamén aforamentos". Pon o exemplo da Rioxa, onde o goberno autonómico rioxano "abriu" a hostalaría na súa totalidade.
"PERPETUACIÓN" DE RESTRICIÓNS
Nesta liña, a Asociación Empresarial Hostalaria.gal denuncia unha "perpetuación" das restricións por parte da Xunta, o que causa un "incalculable" dano económico ao sector. Unhas dificultades que "provocaron a desaparición de centos de empresas e miles de postos de traballo", debido a unhas medidas que se manteñen de "modo inexplicable". Por iso, Hostalaria.gal esixe a eliminación de todas as medidas restritivas que "demostraron ser totalmente ineficaces" respecto dos contagios de covid.
