Feijóo queixase da actitude do Goberno central ante o amago de denuncialo: "Non se molestaron en chamar"
A Xunta atrasa "un mes máis" a súa decisión de levar ao Goberno ao Supremo pola repartición dos fondos de emprego.
Por Europa Press / Redacción | SANTIAGO DE COMPOSTELA | 27/01/2022 | Actualizada ás 14:16
O presidente da Xunta, Alberto Núñez Feijóo, informou este xoves de que o Goberno galego decidiu "dar un mes máis" ao Executivo de Pedro Sánchez para ver como se sitúa ante o requirimento da Comunidade en relación á "repartición discrecional" dos fondos europeos de emprego.
Se a resposta segue sen chegar ou é insatisfactoria, a Xunta mantén a intención de presentar un recurso ante o Tribunal Supremo, segundo indicou o presidente galego na rolda de prensa posterior á reunión semanal do seu Executivo, celebrado este xoves en Ferrol de forma extraordinaria.
Feijóo xustificou que a intención da Xunta é esgotar a vía do diálogo e tratar de non ter que "denunciar" ao Goberno, aínda que se queixou de que "nin se molestase en facer unha chamada telefónica" ante o requirimento que lle enviou a Xunta, algo "sacro" --cualificou-- na relación entre administracións públicas.
En todo caso, destacou que as reivindicacións funcionan, á vez que anunciou que a Xunta acordou aceptar a vía proposta polo Executivo estatal para a devolución dos 211 millóns do IVE que debía á Comunidade, máis 13 millóns de intereses.
