Feijóo ratifica que haberá unha terceira edición do bono turístico para "desestacionalizar" a demanda
Califica a iniciativa de "exitosa", pois permitiu inxectar no sector turístico ao longo do pasado ano un total de 7,7 millóns.
Por E.P. | SANTIAGO DE COMPOSTELA | 27/01/2022 | Actualizada ás 18:52
O presidente da Xunta, Alberto Núñez Feijóo, ratificou que o Executivo autonómico prepara unha terceira convocatoria do bono turístico, que se poderá usar en tempadas medias e baixas co obxectivo de "desestacionalizar" a demanda, na liña do xa anunciado polo vicepresidente primeiro, Alfonso Rueda.
Ratificouno tras o Consello da Xunta, celebrado en Ferrol, no que se deu conta do balance que supuxo o funcionamento do bono turístico, unha iniciativa que Feijóo definiu como "exitosa", activada no primeiro ano de pandemia e que tivo continuidade en 2021. A iniciativa permitiu inxectar no sector turístico ao longo do pasado ano un total de 7,7 millóns de euros nun momento, remarca a Administración autonómica, "especialmente difícil para o sector".
Fronte á primeira edición, a segunda convocatoria do bono turístico tivo como principais novidades a súa apertura ao conxunto da poboación galega, que puido optar a cartóns con tres importes --500, 375 e 250 euros--, coa obrigación de facer un copago do 40% do importe total.
Estes cartóns deron como resultado máis de 30.000 transaccións en máis dun milleiro de empresas asociadas, das que máis dun 75% foron hoteis, pero tamén beneficiou outros segmentos do tecido empresarial turístico galego, como casas de turismo rural, campamentos, axencias de viaxe ou balnearios.
CASE 12.300 BENEFICIARIOS
O informe recolle, ademais, que finalmente foron case 12.300 as persoas que finalmente se beneficiaron deste cartón desconto, que foi "moi ben" acollida pola poboación xeral, que esgotou en menos de 12 horas os primeiros cartóns que se puxeron en circulación.
Do conxunto de cartóns expedidos operaron o 99%, o que tamén evidencia, segundo o Executivo galego, "o bo funcionamento do sistema", que permitía gastar o bono en establecementos de aloxamento turístico ou en axencias de viaxes adheridas á iniciativa.
De feito, para esta edición adheríronse máis do dobre de empresas participantes que na primeira, un total 1.200 fronte a 560.
ESPAZOS TERMAIS DE USO LÚDICO
A Xunta tamén informou de que apoiará a mellora das instalacións dunha decena de espazos termais de uso ludíco. A Vicepresidencia Segunda destina 1 millón de euros a esta nova orde de axudas dirixida aos concellos galegos.
Estes apoios, que cubrirán o 80% do importe total das actuacións, buscan ofrecer máis e mellores servizos. O programa aspira a contribuír a fomentar o turismo e dinamizar a economía dos municipios beneficiarios.
