Por E.P. | SANTIAGO DE COMPOSTELA | 28/01/2022 | Actualizada ás 17:34
A Comisión 6ª do Parlamento galego aprobou este venres por unanimidade a Proposición Non de Lei pola que, a petición do grupo socialista, ínstase á Xunta a elaborar e publicar un mapa definitivo dos xeodestinos turísticos de Galicia, así como a definir o marco normativo polo que se rexerá esta figura.
A deputada socialista Leticia Gallego defendeu ante a comisión 6ª de Industria, Enerxía, Comercio e Turismo, a necesidade de que o Executivo galego cumpra coa proposta aprobada por unanimidade no Parlamento en marzo de 2021, na que se pedía redefinir os xeodestinos turísticos.
Para Gallego esta actitude demostra o "deixamento" da Axencia Galega de Turismo neste tema, que non quere solucionarse porque, para iso, "hai que sentar con moitos alcaldes e alcaldesas". Así, lamentou a "falta de planificación e diálogo" cos municipios, "que non son escoitados polo Goberno galego".
"É imprescindible, tal e como recolle a lei, que a Xunta abra un proceso de diálogo cos concellos e coas deputacións para estudar e redefinir os posibles cambios no mapa actual de geodestinos", incidiu. O mapa final, apuntou ademais, deberá adquirir "un verdadeiro carácter oficial coa súa publicación no DOG".
Nesta liña, subliñou tamén a importancia de desenvolver un marco normativo que defina con claridade o proceso de creación dos xeodestinos, así como os seus órganos xestores, funcións, competencias e mecanismos de modificación.
NOVO MAPA "EN POUCO TEMPO"
O deputado nacionalista Daniel Pérez tamén remarcou a importancia dos xeodestinos nun contexto pandémico e postpandémico, "onde debería adquirir un papel protagonista", dada ademais a súa influencia na desestacionalización dos fluxos turísticos. Pediu ademais unha regulación que evita "arbitrariedades e tratos desiguais".
Pola súa banda, Borja Verea, do grupo popular, lembrou que os xeodestinos foron aprobados nunha lei de 2011, "unha estratexia creada polo PP e unha ferramenta moi útil". "Desde 2012, investíronse máis de oito millóns de euros desde a Administración autonómica para a súa posta en marcha. Agora toca actualizalo e renovalo, e asignar mellor os recursos", comentou.
Ademais, confirmou que o Goberno galego está xa en conversacións cos concellos, dos que xa recibiron as propostas de mellora, e en pouco tempo presentarán o novo mapa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.