A campaña para converter ao Carballo de Conxo na "nova catedral" difundirá o seu "simbolismo e historia"
Concello, Xunta e Goberno únense para apoiar esta campaña que se desenvolverá a partir de mañá e ata o 28 de febreiro cunha meta: conseguir 100.000 votos.
Por Europa Press / Redacción | SANTIAGO DE COMPOSTELA | 31/01/2022 | Actualizada ás 17:46
O Carballo de Conxo de Santiago de Compostela, xa convertido en Árbore do Ano 2022 en España, buscará ao longo deste mes de febreiro ser o gañador do mesmo certame a nivel europeo. Pero hai outro obxectivo engadido: convertelo "na nova catedral" como "unha referencia" non só para a cidade, senón tamén para Galicia e para todo o Estado.
Así o proclamou o alcalde compostelán, Xosé Sánchez Bugallo, durante a presentación dunha campaña que se desenvolverá a partir deste martes, 1 de febreiro, e que concluirá o día 28. Ao acto celebrado no Bosque do Banquete de Conxo asistiron, ademais do rexedor, membros de toda a Corporación local e autoridades da Xunta e do Goberno central.
En concreto, asistiron o director xeral de Biodiversidade, Bosques e Desertificación do Ministerio para a Transición Ecolóxica, Jorge Luís Marquínez; a conselleira de Medio Ambiente, Territorio e Vivenda da Xunta, Ángeles Vázquez; e a presidenta da Asociación Bosques sen Fronteiras, Susana Domínguez; entre outros.
O "simbolismo e a historia" do Carballo e do Bosque do Banquete de Conxo é o que o fai especial de entre as máis de 600 hectáreas de zonas verdes que ten o termo municipal de Santiago. Segundo o alcalde, este espazo foi "vítima de moitas cousas", desde vagas de incendios --a última, a do 2006-- ata a construción dunha autoestrada e a primeira liña de ferrocarril de Galicia. "O Carballo pasou por todo isto e aquí está, perfectamente ben e perfectamente san", destacou Bugallo, para resaltar a importancia de conservar este exemplar para que teña outros "250 anos de futuro".
Ao longo das próximas semanas, o Carballo de Conxo pugnará contra outras 15 árbores doutros tantos países do continente, polo que o rexedor recoñece que "non é fácil". "Pero temos estimado que, a partir de 100.000 votos, podemos gañar", afirmou. Así, Bugallo convidou a que todos os composteláns, uns 98.000, apoien esta campaña. Pero, se votasen todos os galegos, conseguiría 2,7 millóns de puntos. "Aquí non hai xurado profesional, todo depende do noso voto", ironizou, ao non poder evitar acordarse do polémico paso das Tanxugueiras polo Benidorm Fest.
De feito, o Concello comprométese a plantar un carballo por cada voto conseguido ata o 2030, empezando por uns 19.000 que se plantarán ao longo deste 2019.
"VAI A SER DIFÍCIL"
Aínda que "vai ser difícil" porque "hai moi boas árbores" neste certame europeo, a presidenta de Bosques sen Fronteiras confía en que esta especie compostelá consiga quedar "moi arriba". Con todo, máis aló deste fito, Susana Domínguez resaltou o valor destes concursos para facer "que a xente vexa os bosques dun modo diferente", mentres que lembrou a importancia que tivo o de Conxo para o antigo hospital psiquiátrico.
"Foi un bosque de saúde mental hai moitísimos anos. Moita xente logrouse curar grazas ás árbores", puntualizou, para recalcar como estes seres vivos axudan á "saúde física e mental".
O BANQUETE DE CONXO, "UN EVENTO HISTÓRICO"
Pola súa banda, o director xeral de Biodiversidade subliñou a importancia das árbores singulares como este para que os humanos se sintan "parte da natureza". Segundo as súas palabras, o Carballo de Conxo "axunta un evento histórico, feliz, simbólico e moi significativo" como foi aquel Banquete Democrático de 1856 no que participaron varias figuras crave da historia intelectual de Galicia, como Eduardo Pondal.
Así mesmo, José Luís Marquínez asegurou que este carballo e a súa campaña para ser Árbore Europea do Ano é "unha chamada" para recuperar as 'carballeiras' de Galicia e do norte de España, un labor para a que comprometeu a Concello e Xunta o apoio do Ministerio.
CATÁLOGO DE ÁRBORES SINGULARES
A conselleira de Medio Ambiente asistiu ao acto de presentación da iniciativa cunha petición ao goberno local: que solicite a catalogación do Carballo de Conxo como árbore singular para que así sexa incluído no catálogo galego, no que xa hai 143 exemplares e 38 formacións naturais inscritos.
Ángeles Vázquez agradeceu ao Concello o seu traballo para vencer no certame a nivel estatal e animou ao conxunto da sociedade a votar para que sexa Árbore Europea do 2022.
A conselleira de Medio Ambiente tamén instou á poboación a coidar e conservar os bosques dada a súa "labor fundamental" de absorber o dióxido de carbono que emite o ser humano coas súas actividades, á vez que destacou, non en balde, que o 42 por cento do territorio da Comunidade galega conta con algunha figura de protección.
