Por Europa Press / Redacción | SANTIAGO DE COMPOSTELA | 03/02/2022 | Actualizada ás 14:34
O Servizo Galego de Saúde administrará a terceira dose da vacina contra a covid antes dos cinco meses a aquelas persoas que pasasen recentemente a enfermidade e que así o soliciten. Diso informou este xoves o presidente da Xunta, Alberto Núñez Feijóo, na rolda de prensa posterior á reunión semanal do seu Goberno.
Na súa intervención, o máximo mandatario autonómico lembrou que as últimas recomendacións aconsellan esperar cinco meses desde que se pasa o virus para recibir a terceira dose. En todo caso, explicou que a Xunta adopta un "dobre criterio". Así, con carácter xeral, o Sergas citará a esas persoas cando pasen o cinco meses. Con todo, se algunha desexa vacinarse antes, dado que "o protocolo permite facelo despois de catro semanas", poderá pedir cita a través do teléfono 881 54 00 45.
Ademais, a este número tamén poderán chamar todas as persoas que non puidesen acudir a vacinarse por motivos persoais ou laborais no día que foron citados. Nos próximos días, ademais, o Sergas habilitará autocitas para todas as persoas que non puideron acudir no día no que foron chamadas.
"Á CABEZA EN VACINACIÓN"
"Levamos administradas case 6 millóns de doses, o 94,5% dos galegos maiores de 12 anos teñen dobre dose de vacina, fronte ao 90% da media de España. Estamos á cabeza de vacinación de todos os grupos etarios", destacou o presidente. Así, citou o caso dos menores de entre cinco e 12 anos, para asegurar que o 81,5% xa conta coa primeira dose, "25 puntos por encima da media estatal", e que desde o martes chamouse a 48.000 nenos desta idade para que reciban a segunda dose.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.