Proposta do PSdeG para limitar a dous días a espera para Atención Primaria

O secretario xeral do PSdeG, Valentín González Formoso, propuxo limitar a dous días a espera máxima para ter asistencia en atención primaria, unha medida que os socialistas galegos defenderán no Parlamento de Galicia a través dunha proposición de lei para modificar tanto a Lei de Saúde de 2008 como a Lei de Garantías do 2013.

Nunha rolda de prensa ofrecida este luns na Cámara galega xunto ao portavoz de Sanidade, Xullo Torrado, e o portavoz parlamentario, Luís Álvarez, Formoso chamou ao acordo entre as forzas políticas parlamentarias para reforzar a atención primaria tras as "debilidades" evidenciadas polo impacto da pandemia tras "unha década de recortes" do Goberno galego que "dispararon as esperas" na primaria, que "parece máis un servizo de atención telefónica".

A proposta dos socialistas fixa un límite de demora na atención primaria similar ao da atención hospitalaria pero, ao contrario destas, inclúe a prohibición de derivar as consultas de primaria ao servizo concertado privado de saúde, e contempla un reforzo significativo dos persoais dos centros de saúde, obrigando a establecer cadros de persoal para a PAC e que as unidades asistenciais sexan completas, polo que por cada médico ou médica deberá haber un enfermeiro ou enfermeira.

Así mesmo, reclama a simplificación da administración hospitalaria, habilitando aos médicos de familia para que poidan solicitar unha serie de probas diagnósticas, sen estar obrigados a recorrer ao especialista. A situación actual, dixo, "depaupera a figura do médico de familia", e abrir a posibilidade de pedir estas probas permitiría "axilizar enormemente a atención especializada".

González Formoso tendeu a man ao Goberno galego e ás forzas políticas parlamentarias para acordar o reforzo da atención primaria, a "primeira liña de batalla" que está a "evidenciar" as consecuencias dos "recortes" do Goberno galego desde a chegada de Feijóo á presidencia da Xunta.

Formoso, que asegurou querer trasladar unha "mensaxe de responsabilidade política" á cidadanía ao asegurar que "non están só para pór deberes ao goberno, senón tamén para propor solucións", incidiu en vontade de sentar nunha mesa co goberno para "facer realidade" estas melloras.

Ademais, na rolda de prensa, o portavoz de sanidade do Grupo Socialista, Julio Torrado, explicou que a proposta se dirixe ao dobre obxectivo de reafirmar a vontade do PSdeG de traballar a favor dos acordos, e da necesidade de fixar garantías de calidade no sistema sanitario.

A finalidade última, dixo, é "garantir a maior calidade sanitaria para o paciente", e reforzar a calidade asistencial para que non se repita o peche de servizos de Vigo, derivado da "incapacidade de xestión" do Goberno galego.

O portavoz de Sanidade do PSdeG, Xullo Toerrado; o secretario xeral do PSdeG, Valentín González Formoso; e o portavoz parlamentario da formación, Luís Álvarez, en rolda de prensa. PSDEG | Fonte: Europa Press