A Policía Nacional apela á precaución e a denunciar "de inmediato" ante o "notable aumento" de ciberdelitos

O xefe da unidade UDEF-Ciberdelincuencia da Comisaría da Policía Nacional de Pontevedra, o inspector Juan José Varela, instou á cidadanía a que adopte medidas preventivas para atallar o "notable aumento" das denuncias por delitos cometidos a través de Internet e recalcou a importancia de denunciar "inmediatamente" se se é vítima dun ciberdelito.

Nun encontro cos medios de comunicación de Pontevedra, o inspector Juan José Varela sinalou que cando se navega por Internet os usuarios realizan xestións que nunca farían en persoa, como facilitar contrasinais ou datos identificativos ou realizar pagos con transferencias sen verificar previamente o destinatario.

Un dos delitos que máis prolifera en internet é o "phishing" ou a suplantación da identidade para obter datos persoais e bancarios dos usuarios e tamén das empresas. Tamén se multiplican as fraudes, desde sorteos nos que en realidade non se regala nada, pasando por tendas en liña fraudulentas.

Desde a Comisaría Provincial de Pontevedra lembraron que o fundamental para evitar ser vítimas dalgúns delitos é "o sentido común", reflexionar antes de actuar, non responder de forma impulsiva, actualizar os perfís e contrasinais periodicamente e adoptar medidas básicas de prevención como non facilitar nunca datos de carácter persoal ou contrasinais a través do teléfono móbil ou o computador.

Outros delitos que tamén están en auxe son o sexting (ou sextorsión) e o grooming. O primeiro ten que ver co envío de mensaxes con contido sexual a través do teléfono e o segundo é o ciberacoso sexual a menores.

CONSELLOS BÁSICOS

Entre os consellos básicos que traslada a Policía figura o non enviar nunca fotos do D.N.I, xa que con esa información pódese suplantar a identidade dunha persoa, solicitar créditos, abrir contas bancarias, ou dar de alta liñas telefónicas, que son algunhas das estafas máis repetidas.

Tampouco se deben facilitar nunca datos persoais ou de cobro por teléfono. Neste sentido, o máis seguro é acudir fisicamente á tenda, sucursal ou empresa que requira esta información e facilitala en persoa.

Respecto da compravenda de artigos de segunda man por internet, o consello é acudir a páxinas web "de absoluta confianza", que estean verificadas co "https" na dirección, que conten co cadeado de seguridade e, se é posible, que utilicen pasarelas de pago, pois dan maior seguridade ao cliente de que, en caso dalgún problema, garántese o reembolso.

As transferencias que se realicen con motivo de pagos por compras, só se deberán de realizar unha vez, e aínda que o vendedor manifeste que non lle chegou a mesma.

PAGOS

Aqueles pagos por compras que se realicen a través de internet, en páxinas de empresas de recoñecida publicidade, deberanse facer sempre a través da operativa habitual polo que o usuario debe desconfiar se se comunican con eles a través de whatsapp para requirir un novo pago ou unha transferencia bancaria se esa non é a modalidade habitual de pago.

Se aínda con estes consellos, finalmente un acaba sendo vítima, o consello tamén é claro: hai que denunciar "inmediatamente", pois "canto menos tempo transcorra, a investigación vai ser máis exitosa". Ademais, hai ocasións nas que a transferencia ou compra fraudulenta da que fuches vítima aínda pode ser reversible se se actúa con rapidez.

A Garda Civil de Lugo incorpora na provincia un equipo especializado na loita contra a ciberdelincuencia.. SUBDEGELACIÓN DO GOBERNO EN LUGO