Atopan ósos na zona onde apareceron restos dos mozos desaparecidos na ría de Muros e Noia en 2020
Os primeiros indicios apuntan que poderían ser humanos.
Por Europa Press / Redacción | SANTIAGO DE COMPOSTELA | 11/02/2022 | Actualizada ás 17:39
Uns mariñeiros que faenaban este venres na costa de Porto do Son localizaron uns ósos que, segundo os primeiros indicios, poderían ser humanos. A zona do achado, segundo fontes da investigación consultadas por Europa Press, está a un quilómetro aproximadamente do punto no que se atoparon restos óseos dun dos dous mozos desparecidos na ría de Muros e Noia no verán de 2020 mentres practicaban kaiak.
Os restos localizados este venres atopábanse no aparello recolleito por uns pescadores que traballaban nas inmendiacións da capela da Atalaia, en Porto do Son. Os primeiros indicios apuntan a que os ósos, mergullados a unha profundidade de entre 22 e 25 metros, poderían ser unha columna vertebral dun humano.
Os restos foron recollidos pola Policía Xudicial de Noia, que procederá ao seu traslado ás instalacións do Instituto de Medicina Legal de Galicia para a súa análise.
COSTELA ACHADA EN NOVIEMRE
Os ósos localizados este venres na ría de Muros e Noia atópanse a un quilómetro do lugar onde apareceu unha costela que, tras ser analizada, resultou ser dun dos mozos desaparecidos en xullo de 2020 cando ían a bordo dun kaiak. O Instituto de Medicina Legal de Galicia (Imelga) analizou a orixe do óso tras o seu achado o 30 de novembro por parte dun barco pesqueiro que navegaba pola zona na que os mozos desapareceran.
En concreto, a desaparición dos dous mozos remóntase ao 6 de xullo do 2020. O accidente tivo lugar na praia de Coira, na localidade de Portosín, onde tres amigos --dous mozos e unha moza-- facían uso dun kaiak.
Ese mesmo día sobre as 21,30 horas, un particular avisaba ao 112 de que facía tres horas que os tres novos saíran a navegar e non volveran. Tras coñecer os feitos, Salvamento Marítimo mobilizou un dispositivo de procura con medios marítimos e aéreos, ademais de terrestres e subacuáticos.
Os servizos de emerxencia localizaron o día da desaparición o kaiak envorcado e rescataron á moza en terra, tras o cal foi trasladada ao Complexo Hospitalario Universitario de Santiago (CHUS). As outras dúas persoas que viaxaban no kaiak, dous homes, permanecen desde entón en paradoiro descoñecido.
