O PPdeG celebra o fin das restricións horarias na hostalaría galega tras un "enorme esforzo" do sector
Tellado fai "unha chamada á responsabilidade, tanto individual como colectiva".
Por Europa Press / Redacción | SANTIAGO DE COMPOSTELA | 11/02/2022 | Actualizada ás 18:11
O secretario xeral do PPdeG, Miguel Tellado, celebrou este venres que a partir da medianoite do sábado ao domingo vaian decaer as restricións de horarios impostas na hostalaría en Galicia para reducir a incidencia da covid-19, o cal é posible tras o "enorme esforzo" do sector.
Na súa habitual rolda de prensa dos venres, o 'número dous' dos populares galegos agradeceu non só a actitude de "todos os empresarios, autónomos e traballadores" da hostalaría e do lecer nocturno, senón tamén a "responsabilidade colectiva" da poboación.
"Hoxe sabemos que o seu esforzo valeu a pena e salvou vidas", subliñou Tellado, quen por tanto quixo trasladarlles as grazas "en nome do PPdeG e de todos os galegos".
En canto á situación sanitaria, o secretario xeral destacou que a galega sexa a Comunidade "con menor taxa de mortalidade" de toda a península e a que ten a taxa de vacinación "máis alta de toda España".
Isto é grazas, dixo, aos traballadores do Servizo Galego de Saúde e a "xestión responsable" desenvolvida por parte da Xunta. Así a todo, a pesar de que decaian as restricións horarias, Tellado quixo facer "unha chamada á responsabilidade, tanto individual como colectiva", para que esta situación non se reverta.
