Protestas en Santiago contra a deportación dunha muller kurda

Decenas de persoas mobilizáronse este mércores en Santiago de Compostela, fronte á comisaría da Policía Nacional, para denunciar a deportación dunha muller de orixe kurda. A concentración foi convocada polo Foro Galego de Inmigración, despois de que este martes, a muller, duns 50 anos, acudise a asinar á Oficina de Estranxeiría de Santiago, como cada 15 días porque tiña unha orde de expulsión, e queda detida para a súa posterior deportación.

Trátase dunha muller kurda, de nacionalidade turca, polo cal a deportación se realizaría a Turquía, país no que, segundo o irmán da afectada, estaría en prisión en dúas ocasións por "problemas políticos". Por este motivo, cre que a deportación a Turquía lle podería causar prexuízos á súa irmá. O irmán, que tamén estaba presente na concentración, sinalou que ela chegara a España porque aquí ten outro familiar desde hai case 20 anos. Agora, ela leva ao redor de 7 anos en Galicia, tratando de legalizar a súa situación.

A avogada da Asociación de Migrantes de Galicia (AMIGA), Maite Bustamente, explicou que o obxectivo inmediato é tentar paralizar a expulsión, pero recoñeceu que, "unha vez que se pon en marcha o mecanismo de deportación é moi difícil paralizalo". Agora esperan unha última posibilidade legal, que pasaría por unha solicitude cautelarísima, que tentaría paralizar o procedemento xa no aeroporto.

Ademais, segundo manifestou a avogada, xa se solicitou un recurso contencioso sobre a súa expulsión e un arraigamento social. Por iso, desde o Foro entenden que é unha persoa que fixo todo o posible para tentar regularizar a súa situación. Este mércores, a muller foi trasladada a Madrid para a súa posterior deportación e, en Galicia, os seus familiares e amigos esperan que se poida paralizar e evitar o seu regreso a Turquía.

Chegada de estudantes procedentes de Mallorca ao aeroporto compostelán de Lavacolla.