Por Galicia Confidencial | Compostela | 12/05/2014 | Actualizada ás 15:00
O 7 de marzo a Xunta aprobaba unha resolución para destinar 1.135.000 euros ás empresas xornalísticas e de radiodifusión durante o 2014. Unha cantidade que non inclúe os convenios ou outras ordes que as consellerías ou a Xunta fai especificamente con cada medio. O 5 de febreiro eran 41.000 euros os que a Xunta destinaba ás publicacións periódicas escritas integramente en galego.
Tres e dous meses, respectivamente, despois destas dúas ordes, a Secretaría Xeral de Medios acaba de publicar outra resolución para ampliar o importe da contía máxima dos créditos destinados a dar cobertura orzamentaria a esas axudas. Deste xeito, o montante total das axudas pasará a ser de preto de dous millóns de euros. Unhas axudas que chegan, ademais, en plena campaña electoral das europeas.
Precisamente, o voceiro do PSdeG no Parlamento, José Luis Méndez Romeu, criticou este anuncio que, dixo, coincide “no medio da campaña”. Foi nunha rolda de prensa na que anunciou a presentación dun recurso ante a Xunta Electoral Central polo novo anuncio de Ana Pastor sobre as obras en Rande, que o PSdeG considera electoralista.
A Xunta aumenta o crédito para as empresas xornalísticas e de radiodifusión en 540.000 euros, de forma que o importe total será de 1.675.000,00 euros. Por outra banda, incrementará en 160.000 euros as achegas para as publicacións periódicas escritas integramente en galego, de forma que o importe total será de 201.341,00 euros.
O Goberno galego xustifica esta medida porque o artigo 2 da convocatoria desta resolución identifica a contía inicial dos créditos destinados a financialas, sen prexuízo de posteriores modificacións orzamentarias. “Así, existindo dotacións dispoñibles para esta finalidade, cómpre ampliar o importe dos créditos inicialmente asignados coa finalidade de manter esta acción de fomento en niveis adecuados”, engade a nova resolución.
Ademais, a presente modificación non afecta ao prazo establecido na referida resolución para a presentación de solicitudes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.