O compostelán Lois Orosa, novo director do Centro de Supercomputación de Galicia

Substitúe no cargo a Mauro Fernández Dabouza.

Por E.P. | Santiago de Compostela | 24/02/2022 | Actualizada ás 18:17

Comparte esta noticia

O Padroado do Centro de Supercomputación de Galicia (Cesga) celebrado este xoves aprobou o nomeamento como novo director xerente desta entidade de Lois Orosa Nogueira, que substitúe no cargo a Mauro Fernández Dabouza.

Lois Orosa, novo director do Centro de Supercomputación de Galicia
Lois Orosa, novo director do Centro de Supercomputación de Galicia | Fonte: Xunta de Galicia.

Nado en Santiago de Compostela en 1982, Lois Orosa é enxeñeiro en Telecomunicacións pola Universidade de Vigo. Doutor en Arquitectura e Tecnoloxía de Computadores, conta cunha ampla experiencia investigadora internacional de primeiro nivel, tanto no ámbito da industria como no académico.

Así, realizou proxectos en empresas como IBM R&D (Israel), Xilinx (Irlanda) e Recore Systems (Países Baixos), así como na Universidade de Illinois en Urbana-Champaign (Estados Unidos), a Universidade Nova de Lisboa (Portugal), a Universidade de Campinas (Brasil) e a ETH Zúric (Suíza). Nesta última exercía ata a data como investigador sénior, realizando tanto proxectos de investigación na área de arquitectura de computadores como tarefas docentes.

Segundo informou a Xunta, o Centro de Supercomputación de Galicia xogará un papel clave no desenvolvemento do Polo de Tecnoloxías Cuánticas que busca consolidar Galicia como referente para o desenvolvemento e validación deste tipo de tecnoloxías, con vocación de ofrecer un impacto positivo en diferentes sectores produtivos.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta