O actor Chechu Salgado recibirá o Premio Ourense no Festival de Cinema Internacional de Ourense

O actor ourensán Chechu Salgado, recente gañador do Goya ao mellor actor revelación, recibirá o Premio Ourense na 27º edición do Festival de Cinema Internacional da cidade (OUFF).

O intérprete foi recibido este xoves no Pazo Provincial polo presidente da Deputación, Manuel Baltar, quen sostivo que é un "orgullo" recibilo en Ourense con este Goya, "gañado e recoñecido, que supuxo unha grandísima alegría" para un ourensán como o e para un goberno como o seu que "leva anos apostando polo cinema".

Chechu Salgado é unha realidade importante que merece que o festival deste ano, a 27º edición do Festival de Cinema Internacional de Ourense, lle outorgue o premio Ourense", dixo Baltar, que incidiu en que o premio leva o nome da provincia.

"Este é o premio que leva o nome da nosa provincia: para recoñecer non só o éxito deste Goya senón o seu traballo, o seu compromiso e, sobre todo, un futuro que todos esperamos infestado de éxitos", apuntou.

Pola súa banda, Chechu Salgado agradeceu este futuro recoñecemento e puxo en valor o apoio da Deputación ao cinema. "É moi necesario e moi importante para todos os que nos dedicamos a isto", indicou o actor, que na actualidade traballa na serie 'Hotel Valquiria', unha produción galego-portuguesa patrocinada pola Deputación de Ourense.

En concreto, Salgado foi recoñecido nos premios Goya polo seu papel de Zarco en 'As leis da fronteira', adaptacion da novela de Javier Cercas dirixida por Daniel Monzón.