Estratexia de FP Galicia 2030: dobres graos, ámbito dixital e transición verde
Os dobres graos de FP inclúen todos os módulos de dous ciclos, que se cursan de maneira simultánea, permitindo obter dúas titulacións nun tempo aproximado de tres anos, lembrou a Xunta.
Por E.P. | SANTIAGO DE COMPOSTELA | 25/02/2022 | Actualizada ás 16:36
A nova Estratexia de Formación Profesional Galicia 2030 impulsará a oferta de dobres titulacións en ciclos formativos e prestará especial atención a ferramentas de futuro como o ámbito dixital e a transición verde.
Así o explicou este venres o secretario xeral de Educación e FP, José Luís Mira, na súa comparecencia no Parlamento para dar conta desta nova folla de ruta que guiará as accións da Xunta de Galicia nestes ensinos.
Centrada no reforzo da oferta e na súa adaptación ás necesidades dos sectores produtivos, no fortalecemento e extensión da rede de centros de excelencia, a estratexia impulsada pola Consellería de Cultura, Educación e Universidade conta cun orzamento de 900 millóns de euros ata 2024.
Os dobres graos de FP inclúen todos os módulos de dous ciclos, que se cursan de maneira simultánea, permitindo obter dúas titulacións nun tempo aproximado de tres anos, lembrou a Xunta.
Galicia comezou en 2017 a implantación destes proxectos, dos que na actualidade están a desenvolverse as dobre titulacións en Dirección de cociña e Dirección de servizos de restauración, e en Coidados auxiliares de enfermaría e Atención a persoas en situación de dependencia.
Ademais, en Galicia pódese obter unha dobre titulación compaxinando o estudo dun ciclo no réxime común e dos módulos que resten doutro polo réxime modular para persoas adultas.
Así mesmo, impártense varios proxectos de FP Dual que incorporan módulos doutros ciclos, en concreto o de Mecatrónica industrial con oferta parcial do ciclo de Automatización e robótica industrial, o de Construcións metálicas con oferta parcial do ciclo de Proxectos de obra civil, o de Procesamiento e transformación da madeira con oferta parcial do ciclo Operacións de laboratorio, e o de Xestión de vendas e espazos comerciais con oferta parcial do ciclo Estética e beleza.
Tal e como explicou o secretario xeral, o impulso da FP Básica, da modalidade Dual e dos másteres de FP completan a estratexia no referido a a mellora da oferta, coordinado coas empresas. De forma complementaria, ampliarase a FP a distancia para atender as necesidades de cualificación das persoas para favorecer a aprendizaxe permanente e a súa empregabilidade. Isto completarase cos procedementos de acreditación de competencias adquiridas pola experiencia laboral.
ESPECIALIZACIÓN DOS CENTROS
No referido ao fortalecemento da rede de centros de excelencia, apostarase pola especialización de cada centro en familias profesionais concretas e vinculadas na contorna. Así mesmo, impulsarase a oferta no rural, diversificándoa e ampliándoa. Nesta tarefa será fundamental a colaboración coas 11.000 empresas que hoxe en día están implicadas na Formación Profesional galega.
"O mundo empresarial apoia a FP, ten confianza nestes ensinos. Traballaremos para incrementar a colaboración das empresas na FP, para a formación dos alumnos e dos profesores, así como para promover a innovación das ofertas", explicou o secretario xeral.
A rede de centros de excelencia estará encabezada polo novo Centro Galego de Innovación da Formación Profesional en Ourense, que abrirá as súas portas neste ano 2022. Centrado en áreas punteiras como a biotecnoloxía aplicada, a fabricación aditiva ou a enerxía e sustentabilidade ambiental, neste novo espazo educativo desenvolveranse proxecto de innovación de interese para o sistema de FP e para as empresas colaboradoras, así como actividades de formación do profesorado.
Precisamente a innovación e a dixitalización é un dos eixos da nova Estratexia de Formación Profesional Galicia 2030, "nun aliñamento estratéxico coas políticas de educación e formación da Unión Europea para potenciar a especialización intelixente e a transición verde e dixital así como, coas diferentes estratexias e plans sectoriais de Galicia en ámbitos tales como o desenvolvemento rural ou a industria", destacou.
