A Xunta presenta o Plan Estratéxico co que busca reducir o paro ao 8% ata 2030
Feijóo critica a xestión dos fondos europeos por parte do Goberno central e defende que non son do Estado, "senón de todos os europeos".
Por E.P. | SANTIAGO DE COMPOSTELA | 02/03/2022 | Actualizada ás 17:06
O presidente da Xunta de Galicia, Alberto Núñez Feijóo, presentou este mércores o Plan Estratéxico 2022-2030, a "folla de ruta" para a próxima década coa que o Goberno autonómico buscará reducir o paro ao 8% e conseguir un crecemento sostido do PIB de entre o 2 e o 2,5%, entre outros obxectivos.
O acto de presentación tivo lugar este mércores na Fundación Santiago Rey Fernández-Latorre, onde o titular da Xunta detallou outros puntos do plan como o obxectivo de "alcanzar a converxencia plena con España, en termos de renda bruta dispoñible per cárpita dos fogares"; ou que tres de cada catro galegos de entre 20 e 64 anos teñan un posto de traballo.
"Ante un clima xeneralizado de incertezas, a planificación é a mellor ferramenta das institucións e do tecido produtivo para definir o camiño no futuro", defendeu o presidente sobre o plan presentado esta mañá. Entre as incertezas expostas polo presidente da Xunta na súa intervención está, sobre todo, a invasión rusa de Ucraína, "un ataque vil e cruel" que provocou, sinalou, un clima de "incredulidade e asombro".
Feijóo aventurou que o impacto económico desta guerra será "difícil de determinar" e que as súas consecuencias as sufrirá a cidadanía rusa, pero tamén a europea, "con vidas perdidas ou arruinadas pola ignominia". "Hoxe Ucraína é sinónimo de liberdade e democracia", defendeu. Á guerra de Ucraína, declarou, súmanse outras "noticias preocupantes" como a inflación, a subida do prezo da enerxía ou o incremento do custo do barril de petróleo.
CRÍTICO COA REPARTICIÓN ESTATAL DE FONDOS EUROPEOS
Neste contexto, apuntou, chegan os Fondos Europeos de Recuperación, cuxa xestión "será determinante para transformar as economías cara á sustentabilidade e a dixitalización" e cuxa administración por parte do Estado volveu a censurar Núñez Feijóo.
"Non podemos dar por feita a recuperación e non podemos permitirnos a improvisación. Nós cumprimos cando Europa demandou a presentación de proxectos, elaborados en colaboración co tecido produtivo galego", destacou, poñendo como exemplo a primeira fábrica de fibras téxtiles ou o deseño dunha planta de hidróxeno verde.
Ante isto, Feijóo instou o Executivo central a "corrixir o rumbo errático" e pediu "transparencia e xustiza na repartición", dado que "os fondos non son do Estado, son dos europeos". "Vimos constatando unha distribución marcada polo centralismo e a lentitude, onde o Goberno reserva o 70% dos fondos", censurou, poñendo como exemplo de "repartición non acordada" a fábrica de baterías, "sendo Galicia unha das comunidades con máis relevancia dentro do sector da automoción".
"O descargo que o Goberno realizou nas autonomías para a xestión do virus, agora é accesorio, cando pretende quedar coa vacina económica da crise. Non haberá nada do que presumir se fracasamos na xestión dos fondos", asegurou, sinalado que o propio Banco de España "indicou que o atraso nas reparticións" afectará ao PIB. "Só esperamos que o Goberno descentralice os fondos para poñer fin ao atasco que de momento se está producindo", insistiu.
A este respecto indicou que só hai dúas saídas: "contemporizar, navegar á deriva ata que despexe a treboada; ou planificar, elixir que queremos ser e como o podemos facer". Esta segunda opción, reflexionou, é a que seguirá Galicia co Plan Estratéxico.
NOVO SERVIZO GALEGO DE SAÚDE
En canto ao plan, outro dos puntos destacados será o "novo Servizo Galego de Saúde", respecto ao que explicou que "só as obras executadas ou comprometidas en infraestruturas hospitalarias superan os 1.000 millóns de euros". Remarcou ademais que prevén a construción de 51 centros de saúde e perseguirán "reducir un 30% a espera estrutural cirúrxica e un 27% a espera estrutural de consultas".
Doutra banda, no que respecta a educación, o obxectivo será, ademais de universalizar a gratuidade das escolas infantís, en vigor a partir de setembro, "consolidar á educación galega como unha das mellores de España, baixando a taxa de abandono escolar ata o 6%.
O Plan Estratéxico busca avanzar tamén na neutralidade climática, respecto da que prevén reducir as emisións de efecto invernadoiro ata o 55% respecto de 1990, así como que as enerxías renovables alcancen ata o 58% na porcentaxe final. Outro dos eixos sobre os que pivotará o plan será a potenciación do sector industrial "para reforzar a competitividade", sobre o que remarcou a "aposta" por incrementar as exportacións ata o 45% do PIB e "duplicar o gasto en I+D+i".
Por último, Núñez Feijóo quixo reivindicar a igualdade como "meta irrenunciable" para "conformar unha Galicia sen brechas de xénero", coa equiparación das taxas de ocupación masculina e feminina".
