Por Europa Press / Redacción | A Coruña | 05/03/2022 | Actualizada ás 19:04
A asemblea de traballadores de FCC, que xestiona o servizo de limpeza nas rúas da Coruña, aprobou na noite deste venres o inicio dunha folga tras reunise coa empresa e non conseguir a suba dos salarios ao índice de prezos de consumo (IPC) que solicitaban. Tal e como explicaron representantes do sindicato STL, a folga convócase tras negarse a empresa a cumprir o acordado en maio de 2021 --a suba dos salarios ao nivel do IPC--.
A empresa, relatan, propúxolles o pasado mércores os máximos ata os que podían chegar, que o sindicato trasladou na reunión deste venres aos traballadores. A proposta non foi aceptada, "máis que nada porque, se incumpriron unha vez o acordado, quen nos di que non o van a incumprir outra vez".
"Levamos co soldo conxelado tres anos, coa empresa cun balance económico positivo, xa que o Concello pagou. Debería porse o foco en que a empresa non paga o acordado", insisten.
A folga do servizo de limpeza súmase ao paro "inmediato e inminente" no servizo de recollida de lixo convocado polo comité de empresa PreZero-Cespa, cuxo presidente, Luís Varela, anunciou este venres. Segundo explicou, a folga débese a que a frota de camións está "obsoleta", o "incumprimento" do plan de igualdade e a "persecución" sindical por parte da patronal.
"As negociacións están rotas por parte da patronal e a representación social", sentenciaba Varela e engadía que non poden dar datas concretas, pero que a folga se fará efectiva "o máis pronto posible".
O presidente do comité destacou que "non é lóxico" que a empresa "obrigue" aos traballadores a realizar a recollida de lixos con vehículos que teñen "máis de 27 anos" que están "a sufrir avarías constantemente" e provocan "accidentes de traballo" cando PreZero-Cespa "ten camións novos nas instalacións".
Segundo afirmou, hai unha ducia de compañeiros "aproximadamente" con expedientes sancionadores abertos a semana pasada.
A empresa "ratifica" que son por baixo rendemento, mentres que o comité reitera que poden "demostrar con partes do taller" que os camións están a sufrir "numerosas" avarías que non permiten que se finalice o servizo.
Varela presentou aos medios unha auditoría feita en marzo de 2018 "con fotos de camións que non serven" e asegurou que seguen traballando "cos mesmos".
Respecto da "persecución sindical", o presidente do comité asegurou que existen "ameazas e coacción" por parte da patronal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.