Sanidade establece servizos mínimos do 100% en urxencias na folga de otorrinos de Santiago

O Diario Oficial de Galicia (DOG) publicou este mércores a orde na que se determinan os servizos mínimos durante a folga que afectará o persoal médico do Servizo de Otorrinolaringoloxía da área Sanitaria de Santiago de Compostela e Barbanza a partir deste xoves, 10 de marzo, polo que estableceu que é "imprescindible" a cobertura do 100% na asistencia urxente.

Debido a que a folga de otorrinos comezou afectando a todos os martes desde o pasado mes de xaneiro e agora esténdese aos xoves, o DOG sinala que os servizos mínimos mantéñense para ambos os días.

Así, a Consellería de Sanidade establece como presenzas mínimas para cubrir as xornadas de folga neste servizo de dous efectivos en quirófano, un en Urxencias, "un ou dous, en función da organización das gardas médicas" e outro para hospitalizacións, consultas externas e probas.

Sanidade xustifica que nos servizos de urxencias e gardas médicas, así como quirófanos urxentes "é imprescindible a cobertura do 100% da asistencia urxente" porque, alega, "non é posible prever as necesidades ao non ser unha actividade programable e, posto que nestes casos é preciso dar unha resposta inmediata, ten que manterse a cobertura sanitaria establecida para os supostos de urxencia".

Na área de hospitalización indica que se fixa o número necesario de profesionais "para garantir a atención urxente dos enfermos hospitalizados e as altas clínicas". "Os pacientes ingresados precisan do control adecuado que permita asegurar o seguimento da súa evolución e a supervisión do tratamento, evitando estancias innecesarias que poidan modificar ou complicar dita evolución", destaca Sanidade.

Otorrino nunha sesión de otorrinolaringoloxía