A ministra de Transportes presenta a conexión ferroviaria do Porto Exterior da Coruña como "unha obra de Estado"

A ministra de Transportes, Mobilidade e Axenda Urbana, Raquel Sánchez, presentou este venres na Coruña a licitación da conexión ferroviaria do porto exterior de Punta Langosteira, á que cualificou como "unha obra de Estado". O proxecto conta cun investimento de case 140 millóns de euros, nun prazo de execución de 48 meses, e con cargo aos fondos Next Generation que serán asignados á Autoridade Portuaria da Coruña.

Sánchez afirmou que o Goberno deu un novo paso "á hora de dotar" a Galicia dunha infraestrutura ferroviaria "absolutamente" necesaria para "dar vida" ao porto de Langosteira cun proxecto "tan ambicioso e completo tecnicamente como esencial e necesario" que ten como obxectivo "incrementar" a produtividade, a competitividade e a capacidade de exportación da economía.

Esta nova infraestrutura, segundo dixo a ministra, dará un "grande impulso" ao eixo atlántico e tamén á competitividade do transporte ferroviario de mercadorías. Ademais, lembrou que os orzamentos do Estado destinan a este corredor atlántico máis de 1.400 millóns de euros para facer "estratexia de país".

Pola súa banda, a alcaldesa afirmou que se trata dunha infraestrutura "esencial" para a cidade, para o porto e para o futuro económico desta "gran área de Galicia". Inés Rey asegurou que este tren, ademais de garantir a viabilidade económica do porto exterior, "vai permitir" sacar da cidade o tráfico de mercadorías perigosas e contaminantes e con iso recuperar tamén un "espazo privilexiado" para A Coruña.