O papel "singular" das filmotecas, tema central dunha xornada organizada polo Consello da Cultura Galega

O Consello da Cultura Galega acolleu este luns a xornada 'Filmotecas e patrimonio audiovisual' na que se reivindicou o papel "singular" das filmotecas e no que os participantes profundaron na súa importancia como centros que traballan con patrimonio audiovisual e onde a conservación e a investigación son actividades "centrais".

A xornada, desenvolvida en Santiago de Compostela e coordinada por Sergio Lago e José Manuel Sande, contou coa participación da xefa do Centro de Conservación e Restauración da Filmoteca de Cataluña, Mariona Bruzzo, e do director da Filmoteca Española, Josetxo Cerdán.

Ambos destacaron como funcións principais das filmotecas a programación, conservación, restauración, exhibición, alianzas institucionais e a formación de novos públicos.

Ademais, tamén coincidiron na importancia da parte patrimonial, sobre o que reflexionaron que non deben entenderse como "un repositorio" de produtos históricos, senón como un lugar de "investigación e conexión".

Pola súa banda, o coordinador e historiador José Manuel Sande fixo un percorrido pola situación das filmotecas en España. Neste sentido, sinalou que a maioría funcionan como "depósito de materiais" e apuntou que un tema pendente a abordar polas filmotecas é a "durabilidade" dos formatos dixitais e a necesidade de optar por unha estratexia conxunta.