Conde viaxa a Colombia para "buscar oportunidades para o naval e investimentos"
Na súa axenda en Bogotá, o vicepresidente económico reunirase co viceministro de Veteranos e Grupo Social e Empresarial do Sector Defensa (GSED), Gustavo Niño.
Por E.P. | SANTIAGO DE COMPOSTELA | 15/03/2022 | Actualizada ás 11:47
O vicepresidente segundo da Xunta e responsable de Economía, Francisco Conde, arrincou a súa viaxe a Colombia cunha "intensa axenda" na que, segundo trasladou, ten varios obxectivos, como a captación de investimentos e a procura de novas oportunidades para o sector naval.
Na súa axenda en Bogotá, o vicepresidente económico reunirase esta xornada co viceministro de Veteranos e Grupo Social e Empresarial do Sector Defensa (GSED) de Colombia, Gustavo Niño. Posteriormente, intervén no encontro empresarial Galicia-Colombia, que se desenvolverá na Cámara de Comercio de Bogotá.
Finalmente, ás 23,00 horas en Galicia (17,00 horas local) reúnese coa ministra de Tecnoloxías da Información e Comunicación, Carmen Ligia Valderrama. En declaracións aos medios, Conde explicou que o obxectivo do foro empresarial no que participan empresas galegas e colombianas é "identificar oportunidades comerciais" para sectores estratéxicos como o naval, o TIC e o contract, co fin de "seguir mantendo a marca de exportacións" logrado en 2021.
No ámbito institucional, remarcou o encontro previsto co viceministro de Defensa para tratar de localizar novas oportunidades para o naval, non só de Navantia, senón tamén de estaleiros privados, para poder "establecer relacións e participar dun mercado importante para Galicia". De feito, aludiu a que se cursará unha invitación para que os estaleiros colombianos poidan visitar Navalia, e establecer "un vínculo de ida e volta entre Galicia e Colombia".
