Por E.P. | SANTIAGO DE COMPOSTELA | 15/03/2022 | Actualizada ás 18:59
A Deputación da Coruña convocou o premio literario Miguel González Garcés de poesía, que chega á súa 31ª edición. O prazo de presentación de traballos publicarase no Boletín Oficial da Provincia (BOP) en próximas datas.
Con carácter bianual desde o ano 2000, o González Garcés "non só dá continuidade ao que xa é unha tradición na convocatoria poética en lingua galega, senón que constitúe un fiable indicador da boa saúde da literatura galega e, en concreto, da súa poesía", indica o responsable provincial de Cultura, Xurxo Couto.
Por outra banda, no ámbito cultural, a institución provincial avanza que 'O son da estrela escura', o primeiro disco editado pola primeira discográfica galega, volverá soar en directo máis de corenta anos despois.
Será o 9 de abril no Teatro Colón, no marco do ciclo 'Pioneiras da música galega', unha iniciativa posta en marcha pola área de Cultura da Deputación da Coruña coa finalidade de recuperar a través de concertos en directo álbums que marcaron a historia recente da música galega e en galego. Este será o terceiro concerto do ciclo e subirá ao escenario do Teatro Colón ao grupo DOA.
Noutra orde de cousas, o Boletín Oficial da Provincia publica este martes as bases da convocatoria do programa de limpeza de praias 2022, a través do cal a Deputación da Coruña repartirá 900.000 euros entre os municipios costeiros da provincia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.