Santiago recibe 47 refuxiados ucraínos: "Dunha vida totalmente normal pasaron a unha guerra"
Todos os refuxiados recolleitos proceden da contorna de Lviv, unha "zona moi castigada" pola guerra.
Por Europa Press / Redacción | SANTIAGO DE COMPOSTELA | 17/03/2022 | Actualizada ás 16:36
Despois de facer por estrada máis de 3.300 quilómetros, este xoves chegaron a Santiago de Compostela medio centenar de refuxiados procedentes dunha "zona moi castigada" de Ucraína, un grupo que trouxo ata Galicia unha expedición liderada polo Equipo de Investigacións Políticas da USC, en colaboración con Aga-Ucraína, e do que a metade son nenos.
Visiblemente cansos, os refuxiados baixaron do autobús que os trouxo a Galicia pasadas as 12,30 horas, en compañía de membros de Bombeiros, Protección Civil, o alcalde de Ares, Julio Iglesias, e o tres investigadoras e profesoras de Políticas da USC que lideraron a expedición, Erika Jaraiz, Paloma Castro e Nieves Lagares; que destacaron que se trata de persoas que "o pasaron moi mal e van necesitar tempo para estar ben".
"Hai que pensar que eles tiñan unha vida totalmente normal, como a que podemos ter nós, e que, literalmente, dixéronme que se levantaron un día cunha guerra", contou Paloma Castro, unha das investigadoras.
O convoi (un autobús e dúas furgonetas) fixo os 3.300 quilómetros que separan Galicia dun punto a 100 quilómetros da fronteira polaca con Ucraína cargados de axuda humanitaria. Alí, encontraron outro autobús fretado polas autoridades ucraínas cos 51 refuxiados que debían trasladar ata Galicia, co que intercambiaron os produtos que levaban.
Todos os refuxiados recolleitos proceden da contorna de Lviv, unha "zona moi castigada" pola guerra. Iniciaron o seu camiño o luns: "Eles viñan moi cansos, algúns pasaran previamente por algún refuxio e outros simplemente tiveran que abandonar as súas casas, que foran ocupadas polo exército ruso", dixo Erika Jaraiz.
En total, dos 51 refuxiados --parte deles viaxan aínda en dous coches en ruta-- aproximadamente a metade son nenos. Tamén hai un mozo que puido saír do país por ser diabético e un home maior, que viaxa coa súa muller e a súa filla. Excepto en dous casos --un con familia en País Vasco e outro en Marbella--, non teñen nexos con España.
PASARÁN UNS DÍAS EN SANTIAGO
Tras chegar a Galicia, os refuxiados pasarán agora entre sete e 10 días en Santiago de Compostela, onde o Concello lles proporcionará aloxamento e manutención. Tamén intervirá para axilizar a obtención das cartas de refuxiado, en colaboración coa Policía.
A partir de aí, nunha acción coordinada polo alcalde de Ares, Julio Iglesias, diferentes concellos de ferrolterra faranse cargo dos refuxiados e buscaranlles un aloxamento estable, así como "todos os servizos necesarios".
Tamén se habilitou un dispositivo do Sergas para facerlles un recoñecemento médico e PCR e coordinouse co refuxio de animais de Santiago unha acción para deixar en corentena e examinar os animais que viaxaron con eles.
A INTENCIÓN É REGRESAR
Durante a viaxe, contaron as investigadoras, procuraron "transmitirlles confianza e apoio", así como proporcionarlles alimento e calquera cousa que precisasen para o seu benestar, sobre todo no caso dos refuxiados máis novos, de só dous e catro anos.
"Eles, aos poucos, nese traxecto, íannos contando algunhas das súas historias. É xente que o pasou moi mal e van necesitar tempo para estar ben", destacou Erika Jaraiz.
Entre as cousas que resultan prioritarias para eles agora é comunicarse cos maridos e pais, que se quedaron en Ucraína, unha situación "moi preocupante", e adaptarse á nova situación con "moito apoio".
Con todo, a medio e longo prazo, confían en volver ao seu país. "Eles necesitan, queren volver, para eles isto é temporal e o que queren é volver e canto antes mellor. Eles están confiados en que haxa pronto unha resolución", resolveu Jaraiz.
14 REFUXIADOS EN RIBEIRA
Por outra banda, o Concello de Ribeira informou de que xa son 14 os refuxiados ucraínos acollidos neste municipio, onde lles están prestando, ademais de aloxamento, atención social, sanitaria, educativa e lingüística.
A concelleira de Servizos Sociais, Ana Barreiro, e a xefa de servizo deste Departamento, Francisca Vidal, mantiveron unha reunión con Rubén Lijó, que o pasado fin de semana trouxo a dúas persoas desde este país.
