Por E.P. | Santiago de Compostela | 17/03/2022 | Actualizada ás 19:32
A Real Academia Galega (RAG) lembrou este xoves a figura do seu expresidente Xosé Ramón Barreiro, "modernizador da institución e construtor da identidade da Galicia presente".
"Como xestor, a RAG beneficiouse da dedicación de Xosé Ramón Barreiro e das súas capacidades. Como intelectual e como historiador, a súa obra marca un fito de extraordinaria relevancia na construción da identidade da nación, unha visión nova e moderna da Galicia histórica e da Galicia do presente", expuxo o presidente desta institución, Víctor Freixanes.
O acto celebrouse con gallo do primeiro aniversario do seu falecemento e tivo lugar na RAG, institución que presidiu entre 2001 e 2009. Tamén o pasado ano faleceu outro dos grandes académicos da institución, o tomiñés Xosé Franco Grande, ao que a RAG tamén lle debe outra homenaxe.
Barreiro foi, segundo destacou Freixanes, un autor "fundamental" dos estudos da historia da Galicia contemporánea e da súa divulgación; un bibliófilo erudito, orador brillante e impulsor dunha nova etapa de renovación da RAG a comezos deste século.
Todos estes perfís foron evocados nun programa que xuntou compañeiros, amizades e discípulos. "Este é un acto de memoria e de agradecemento a quen dedicou tempo, esforzo e moito talento para pór ao día a institución histórica da cultura galega", destacou Freixanes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.