Denuncian que o Concello de Lugo negou un plus a unha traballadora por estar de baixa maternal

CCOO sinala que esta exclusión é "contraria a dereito" e constitúe unha discriminación por razón de xénero.

Por Europa Press / Redacción | Lugo | 17/03/2022 | Actualizada ás 20:10

Comparte esta noticia

Comisións Obreiras denunciou un suposto caso de discriminación por razón de xénero no Concello de Lugo, onde, explican, a unha traballadora se lle negou a percepción do complemento de produtividade porque se excluíu do cálculo o tempo que estivo de baixa por risco durante o embarazo e o posterior permiso de maternidade.

Embarazada
Embarazada | Fonte: Europa Press.

CCOO sinala que esta exclusión é "contraria a dereito" e constitúe unha discriminación por razón de xénero que, ademais, "vai en colisión coa lexislación que protexe as situacións de embarazo e maternidade".

O sindicato lembrou que "numerosas" sentenzas estatais "consagran" o dereito das mulleres a percibir os complementos a que terían dereito durante o tempo de baixa médica por embarazo ou de maternidade. "O contrario constitúe unha discriminación, xa que só as mulleres están suxeitas a este tipo de situacións", destaca o sindicato.

Consideran ademais "anómalo" que a esta traballadora se lle negue un dereito que, "pola contra", si lle foi recoñecido a outras compañeiras en casos similares, o que remarca a discriminación, inciden.

O sindicato instou ao Concello de Lugo a "reconsiderar" a situación e que non "obrigue" á afectada a acudir á vía xudicial para que se lle recoñezan os seus dereitos".

Lembran ademais que o Concello, "malia estar obrigado", aínda non asinou coa representación legal dos traballadores e traballadoras un plan de igualdade para todo o persoal municipal.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta