Centos de transportistas colapsan os accesos ás principais cidades galegas no oitavo día de paro

As protestas do transporte levaron a centos de camións ás cidades da Coruña, Santiago de Compostela e Vigo, como puntos centrais dunha protesta que reúne fundamentalmente a traballadores autónomos ou pequenas empresas nun paro ao que se foron sumando diferentes colectivos.

Organizados a través de grupos de mensaxería (Apetamcor, principal asociación que apoia o paro en Galicia, afirmou que non estaba detrás da marcha compostelá este luns, por exemplo), centos de vehículos de transporte, moitos deles de gando, déronse cita en dous puntos da capital galega, no mercado de gando de Amio e no polígono de Costa Vella e do Tambre, chegando ata a madeireira Finsa, afectada as protestas.

Pasadas o dez da mañá empezou a encherse a capital galega de camións, tractores e vehículos de transporte que, aínda que non provocaron o corte total da cidade, si dificultaron e colapsaron o tráfico, incluso deixando atrapados autobuses urbanos.

Concretamente, a avenida de Lugo, o polígono de Costa Vella, e a zona de San Caetano, onde está a sede da Xunta, foron algúns dos puntos que concentraron máis dificultades, xunto co entrada sueste da cidade, por Pontepedriña.

O alcalde compostelán, Xosé Sánchez Bugallo, manifestou o seu desexo de que non houbese incidentes e mostrou a súa preocupación por que as cousas funcionen coa "maior normalidade posible". Así mesmo, manifestou o seu desexo de que "se atope unha solución" canto antes.

Na Coruña, chegáronse a contabilizar 5 quilómetros de protesta do sector do transporte que entraron pola avenida de Alfonso Molina, seguindo por Matogrande para ser desviados ao porto. Os transportistas recibiron aplausos de viandantes ao seu paso polas rúas coruñesas, ás cales accederon desde a zona de Culleredo pola ponte do Burgo.

En Vigo, os participantes na protesta volveron protagonizar unha caravana lenta de camións que circulou pola A-55 entre Tui e a entrada da cidade. Segundo informaron fontes da Subdelegación de Goberno en Pontevedra, a marcha estivo formada por uns 200 vehículos que entraron pola Avenida de Madrid (o principal acceso á cidade desde Portugal, Ourense e a Meseta) a media mañá deste luns.

A caravana, que estaba escoltada por efectivos de Policía Nacional e Garda Civil, deu a volta á altura da estación de buses e enfilou a autovía de regreso, sen que se producisen incidentes, máis aló das retencións e o tráfico lento.

Por outra banda, este luns tamén se rexistrou presenza de piquetes no Parque Tecnolóxico Industrial de Valadares, aínda que tampouco se produciron incidentes. Do mesmo xeito, fontes do Porto de Vigo confirmaron que a actividade na lonxa e nos accesos ás terminais foi normal.

"MOITA COACCIÓN" E "MEDO" ENTRE QUEN QUERE TRABALLAR

Galicia suma xa un total de nove persoas detidas e 347 identificados desde o inicio do paro no transporte de mercadorías, que vive este luns a súa oitava xornada de protestas. As cifras foron achegadas polo delegado do Goberno en Galicia, José Miñones, quen, en declaracións aos medios este luns na Coruña, volveu denunciar as "coaccións" dos participantes nas protestas, que provocan "medo" entre os transportistas "que si queren traballar".

Segundo os datos achegados por Miñones, desde o inicio dos paros producíronse nove detencións. Cinco delas producíronse o domingo pola súa suposta implicación na picada de 12 pneumáticos dun camión de transporte nos accesos á factoría de Alcoa San Cibrao, en Cervo.

Ademais, case 350 persoas foron identificadas e formuláronse 29 propostas de sanción por infraccións penais e outras 19 por administrativas nos oito días de protestas, nos que o operativo especial no que participan 2.000 axentes de Policía Nacional e Garda Civil realizou 900 escoltas a transportistas.

"Non está a ser un paro pacífico", aseverou Miñones, que apuntou que "a maioría" das mobilizacións previstas para este luns, día no que os transportistas pretenden bloquear os accesos ás principais cidades galegas, "non son oficiais" por non ser rexistradas. "O que non teña permiso non pode acceder ás cidades", apuntou o representante do Executivo central na Comunidade galega, que volveu a subliñar que a interlocución entre Goberno e sector debe realizarse no marco dos "órganos establecidos", en referencia á Confederación Española de Transporte de Mercadorías (CETM).

Nesta liña, insistiu en que o Goberno "non pode reunirse con cada plataforma que apareza" e remarcou que a procura de solucións para pór fin ao conflito debe abordarse nas canles "establecidas".

GOBERNO "AUTISTA"

O presidente da Xunta e candidato a liderar o PP, Alberto Núñez Feijóo, cualificou o Goberno central de "autista" ante as protestas de transportistas e outros sectores afectados pola suba dos carburantes e acusouno de estar "empeñado en buscar culpables e non solucións".

Feijóo manifestou que a estas alturas o conflito debería estar "orientado" e recalcou, ademais, que "debería evitarse".

"Vexo un colapso xeneralizado no Goberno, unha falta de reflexos moi perigosa", dixo aludindo a un sector agrogandeiro e pesqueiro "paralizado". A iso, sumou "problemas de subministración".

"É difícil ver unha treboada tan grande como esta e cun Goberno empeñado en buscar culpables e non solucións", recalcou Feijóo, quen considerou que o Executivo, coas súas manifestacións, está "a insultar" aos que saen á rúa porque "perden diñeiro".

Así, considerou que "recibir descualificativos e insultos dun Goberno é incendiar un conflito que por si só xa está incendiado". Fronte a iso, insistiu en que debe sentar "xa" a negociar "e concretar solucións".

"A conferencia sectorial do Transporte ten que pechar un acordo", apostilou Feijóo, quen pediu aos transportistas, á súa vez, que "deixen saír o leite, a carne ou o peixe". "Non podemos producir tanta pobreza e incerteza", engadiu.

RISCO DE COLAPSO DA CADEA AGROGANDEIRA

O conselleiro de Medio Rural, José González, xunto co director xeral de Gandaría, Agricultura e Industrias Agroalimentarias, José Balseiros, desprazáronse este luns ata Mazaricos para manter un encontro con gandeiros da zona e coñecer a situación do paro do transporte. Cabe destacar que este é o concello de maior produción láctea de Galicia. Tanto por parte da Xunta como dos gandeiros piden ao Goberno central que se reúna "canto antes" coa plataforma que convocou o paro para "desbloquear" esta situación, que pode "facer que colapse a cadea agroalimentaria" galega.

O conselleiro de Medio Rural sinalou que a situación en Galicia "pode volverse dramática", debido ao paro do transporte, que "agravou aínda máis" os problemas que viña sufrindo o sector gandeiro, que xa estaba afectado pola suba das materias primas en 2021 --que se agravou coa invasión rusa a Ucraína-- e agora co paro do transporte.

O titular de Medio Rural urxe ao ministro de Agricultura, Luís planas, que se faga cumprir a lei de cadea alimentaria e esixe "que se faga efectiva a prohibición da venda a perdas". Tamén pide que se reuna coa distribución, a industria e a gandaría para, "canto antes, acordar unha suba do prezo dos produtos" que están a percibir os gandeiros. Tamén reclaman corredores seguros para todo o sector primario galego e que facilite a chegada de materias primas ás industrias de pensos, a chegada dos pensos ás explotacións gandeiras e a saída do leite das granxas; así como a saída de produtos lácteos das industrias e dos produtos cárnicos dos matadoiros.

Paralelamente, González pediu a baixada de impostos dos carburantes e outros insumos claves para o sector primario, como se puxeron enriba da mesa nas protestas deste domingo. Tamén defendeu que a Xunta aprobou un paquete de medidas para dar liquidez ás empresas e paliar a alza dos prezos, como financiar o anticipo das axudas da PAC.

"SITUACIÓN LÍMITE"

O presidente da Confederación de Empresarios de Galicia, Juan Manuel Vieites, instou o Goberno central a recibir ao colectivo de transportistas que está detrás das protestas que este luns viven o seu oitavo día de paro. Antes de participar nunha reunión en Santiago coa conselleira do Mar, Rosa Quintana, e representantes da cadea-mar industria, o líder da patronal galega advertiu que este e a maioría de sectores enfróntanse a unha "situación límite" pola "treboada perfecta" que supón a combinación da alza de prezos, a falta de materias primas e o paro no transporte.

"As medidas teñen que porse enriba da mesa. Todas as administracións deben arrimar o ombreiro. É un momento excepcional que require medidas excepcionais", aseverou Vieites, que incide en que "non se pode agardar" ao 29 de marzo, data anunciada para a entrada en vigor do paquete de medidas do Goberno para atallar a crise de prezos.

Tras apelar a que o Executivo debe "facer os seus deberes" na liña do adoptado por países como Francia, Portugal ou Irlanda; o presidente da CEG acusou o Goberno de "descoñecer de forma abosluta o que ocorre no país".

INDITEX

Inditex advirte aos clientes de todas as súas cadeas de "lixeiros atrasos" na entrega de pedidos como consecuencia do paro dos transportistas.

"Debido á folga de transporte, os pedidos poderán entregarse cun lixeiro atraso", advirte a firma unha vez realizado o pedido 'en liña' en todas as súas insignias, entre elas Zara.

A venda 'en liña' alcanzou os 7.491 millóns de euros no seu ano fiscal 2021-2022 (do 1 de febreiro de 2021 ao 31 de xaneiro de 2022), o que supón un crecemento do 14% en 2021 sobre o incremento do 77% en 2020, polo que os ingresos 'en liña' alcanzan xa o 25,5% do total das vendas do grupo.