A Xunta di que o Goberno "dá as costas" ao transporte e pide que dialogue

A Xunta de Galicia urxiu ao Goberno de España a sentar co sector de transportistas promotores do paro a nivel estatal para "identificar solucións" á actual situación de "colapso", e lamentou que, en lugar diso, está "a dar as costas" ao sector. Así o manifestou o vicepresidente económico do goberno autonómico, Francisco Conde, en declaracións aos medios antes de participar na Asemblea Xeral do Consorcio Aeronáutico Galego.

Conde subliñou que a Xunta está "en interlocución directa" co sector para tratar de buscar esas solucións pero indicou que debe ser o Goberno de España o que asuma a procura dunha saída "desde as súas propias responsabilidades". "Non parece responsable que non tente chegar a acordos co sector", indicou.

Respecto diso, o vicepresidente galego subliñou que o paro non incumbe só unha plataforma minoritaria, senón tamén a autónomos do transporte "que queren unha intercolución co Ministerio". "Lamentablemente, ante o colapso, o Goberno dá as costas ao sector, coas consecuencias que iso está a ter na distribución de mercadorías, e tamén vinculadas ao sector sanitario, agrícola, pesqueiro", engadiu, e lembrou que empeza a haber "problemas de abastecemento e ambientais" que tamén afectan outros sectores.

Francisco Conde reclamou "sensibilidade" ao Goberno e que sente a "dialogar para identificar solucións e chegar a acordos" de forma "inmediata", porque "a situación é crítica". "É o que ten que fai un Goberno responsable", proclamou, e afeou ao Executivo de Sánchez que se fora "de fin de semana" sen sentar co sector.

O vicepresidente económico da Xunta, Francisco Conde. | Fonte: Europa Press