Case 3 anos de cárcere e 680.000 euros a unha muller que golpeou a un home á saída dun pub

A sección segunda da Audiencia Provincial da Coruña condenou a dous anos e dez meses de cárcere, así como ao abono dunha indemnización de 680.000 euros, a unha muller que, en setembro de 2013, propinou dúas puñadas na cara a un home co que discutira nun pub de Ferrol, o que provocou que caese de costas na beirarrúa da rúa.

Segundo informa o Tribunal Superior de Xustiza de Galicia (TSXG), a sentenza recolle que, como secuelas, quedou unha deterioración cognitiva severa, polo que, a partir dese momento, precisou "axuda de maneira continua por terceiras persoas para calquera tarefa básica da vida". Ademais, causoulle "un prexuízo estético moi importante polas cicatrices da cirurxía e a deformidade cranial, pola ausencia de óso frontal".

O tribunal condenou á acusada como autora dun delito idealmente concursado de lesións (malos tratos físicos doloso e delito de lesións por imprudencia grave con resultado de grave enfermidade somática e grave deformidade), concorrendo a circunstancia atenuante de dilacións indebidas.

O HOME FALECEU EN 2015

Tras os feitos, a Seguridade Social recoñeceulle á vítima a pensión de incapacidade permanente, en grao de absoluta para todo traballo, e quedou ingresada nunha residencia de Lugo. En 2015, faleceu por unha pneumonía, polo que a indemnización será percibida pola viúva e o fillo de ambos.

"Trátase de dous golpes no rostro, con maior ou menor forza, e non existen elementos indiciarios que acrediten, máis aló de calquera dúbida, que a autora da agresión fose consciente e previse como altamente probable que a súa acción provocase o gravísimo resultado lesivo", indica a Audiencia na sentenza.

Xuízo a unha muller por estafa en Lugo por un matrimonio ilegal