O teletraballo avanza en Galicia, onde creceu un 10,8% no último ano

Galicia é a cuarta autonomía onde máis creceu o teletraballo no último ano (10,8%) e tamén é a cuarta onde máis persoas teletraballan (13,1% dos seus ocupados), segundo Adecco Group Institute, o centro de estudos e divulgación do Grupo Adecco, e que recolle no Monitor Adecco de Oportunidades e Satisfacción no Emprego.

Segundo este informe, en Galicia hai 143.200 persoas que traballan polo menos ocasionalmente desde o seu fogar, cifra que é un 10,8% máis alta que a dun ano antes e que supón o cuarto maior incremento autonómico (son 13.900 teletraballadores máis). Actualmente o 13,1% das persoas ocupadas galegas traballa, polo menos ocasionalmente, desde a casa, e é tamén o cuarto rexistro máis alto do conxunto autonómico.

A nivel estatal, en cambio, as persoas con opción de teletraballar baixaron un 4% interanual e a proporción de teletraballadores sitúase nun 14,4% do total de ocupados (o seu dato máis baixo en cinco trimestres). 

"Este novo avance consolida a penetración do teletraballo en Galicia", sinalan os responsables do estudo. O 13,1% de teletraballadores que hai agora, aínda que supón un retroceso con relación ao 13,9% que se alcanzou no primeiro trimestre de 2021, supera o 8,8% que había ao final de 2019 e o 6,1% que se rexistrou ao final de 2016.

Nos últimos doce meses o emprego de xornada parcial creceu con máis forza que o de tempo completo na autonomía galega: contratáronse 7.500 persoas a media xornada (+5,3%) mentres a cantidade de ocupados a tempo completo se incrementou en 2.900 ocupados (+0,3%). Agora o 13,5% dos ocupados traballa a tempo parcial en Galicia (+0,3 puntos porcentuais), o dato máis alto en ano e medio.

CONFLITIVIDADE

Sobre a conflitividade laboral, Galicia é parte da tendencia xeral e viu como esta aumentou co retorno á actividade normal. Así, segundo o estudo, presenta un forte incremento no seu número de folguistas: 197% interanual, para quedar en 38,3 participantes en folgas cada 10.000 ocupados. É o segundo dato autonómico máis alto. Na comunidade galega tamén creceu o número de folgas, apuntan. Así, sinala que hai 17,3 conflitos cada 100.000 empresas, o que implica un incremento interanual dun 99% no número de folgas.