Un libro recolle os contidos do foro "As mulleres que opinan son perigosas"

'As mulleres que opinan son perigosas. Catro anos e unha pandemia' é o título do libro co que as xornalistas Diana López Varela e Susana Pedreira recollen os contidos da primeira edición deste foro que promoven en Pontevedra desde 2018.

O libro foi presentado este martes no Concello de Pontevedra nun acto ao que asistiron a presidenta da Deputación, Carmela Silva, e o alcalde, Miguel Anxo Fernández Lores, ademais das dúas autoras desta publicación que converte as quince charlas daquela primeira edición en crónicas xornalísticas e reflexiona coas protagonistas sobre o eco deste evento.

Na presentación, Susana Pedreira explicou que a idea deste traballo xurdiu durante a pandemia, cando o foro tivo que celebrarse de maneira telemática polas restricións. A xornalista subliñou que o libro "quere ser memoria do pasado e reflexión desde o presente", cunha pandemia que cambiou moitas cousas e que por iso volveu falar con cada relator "para saber se seguen pensando o mesmo como mulleres, como feministas e xornalistas".

Pola súa banda, Diana López lembrou que aquela primeira edición do foro desenvolveuse "nun 2018 histórico para o feminismo", no que se convocou a primeira folga internacional e "parecía que había un futuro moi esperanzador do que se falou no congreso, no que se teceu unha rede de relacións laborais e de amizade entre todas". Con todo, incidiu en que os últimos anos non foron precisamente positivos para as mulleres, para as xornalistas, que fixeron "dobre xornada" e teletraballaron. "E diso tamén se fala no libro", sinalou.

A presidenta provincial Carmela Silva insistiu en que "queda moito por facer". "Os datos mostran que segue habendo desigualdade e por iso imos seguir facendo 'As mulleres que opinan'", sinalou sobre este foro que retomará a presencialidade este ano e celebrarase no Teatro Principal, onde naceu, cando finalicen as súas obras.

Pola súa banda, o alcalde Fernández Lores agradeceu o traballo desenvolvido por Susana Pedreira e Diana López "para que Pontevedra sexa pioneira tamén na defensa do feminismo e na visibilización da necesidade de que as mulleres, que son máis do 50% da poboación, teñan presenza nos medios".