Máis de 30 menores que fuxiron da guerra ucraína están xa nas escolas galegas
Algo máis dunha trintena de menores refuxiados ucraínos están xa escolarizados en Galicia, segundo informou a Europa Press a Xunta de Galicia.
Por Europa Press / Redacción | SANTIAGO DE COMPOSTELA | 23/03/2022 | Actualizada ás 19:34
Algo máis dunha trintena de menores refuxiados ucraínos están xa escolarizados en Galicia, segundo informou a Europa Press a Xunta de Galicia. Con todo, a Consellería de Educación espera que o número vaia aumentando e se actualicen os datos nos próximos días, dado ademais que o presidente do Executivo autonómico, Alberto Núñez Feijóo, avanzou este mércores que, no ámbito educativo, se emitiu unha instrución para a escolarizacion inmediata dos menores de idade.
Activaranse, informaba o presidente, programas de orientación e adaptación curricular que axude o alumnado a integrarse canto antes na educación galega e, de forma inmediata, dispoñerase de atención psicolóxica ás persoas ucraínas que estean afectadas por tensión postraumática, "con especial atención a menores".
No ámbito sanitario, as xerencias das sete áreas sanitarias contan con "indicacións claras" para a prestación sanitaria a todos os refuxiados --xa se ofreceron de 400 camas ao Goberno--; mentres que no ámbito social, comunicouse a disposición de 1.400 prazas e no ámbito laboral, as persoas refuxiadas dispoñen de acceso ás oficinas de emprego.
Xa en termos máis xerais, o titular do Executivo galego sinalaba que, segundo datos da Delegación do Goberno, chegaran de forma oficial a Galicia 150 refuxiados, pero que os cálculos elevan a 800 as persoas que fuxiron da guerra na Comunidade galega.
"Necesitamos coordinación, organización, que o Goberno central tome dunha vez as rendas desta situación", aseveraba Feijóo, quen se preguntou se vai existir un plan estatal de recepción e acollida ás persoas desprazadas e cando se concretarán os fondos extraordinarios que as comunidades, concellos e entidades sociais precisan para exercer as súas funcións.
Feijóo reclamou tamén coñecer cantos refuxiados chegan cada día a Galicia, "como se chaman e que idades teñen". "A administración encargada da seguridade interior, das migracións e do control de fronteiras, que é o Goberno central, debe achegar respostas", esixiu o presidente da Xunta, quen dixo que sen coñecer datos concretos e "fiables", non se pode prestar a acollida en "condicións óptimas"
AO GOBERNO
En canto ás medidas que a Xunta estima que debe adoptar o Goberno central, están a concreción da protección específica para menores non acompañados, permitir o acceso ao ingreso mínimo vital (se cumpre este punto ou non, a Xunta ten habilitada a Risga).
O Executivo autonómico tamén pide criterios "claros" para a homologación dos títulos de ensino medio e superior que poden ter as mulleres ucraínas que chegan a Galicia. "Sería inxusto que non puidesen continuar a súa carreira profesional ou os seus estudos porque o Goberno non establece as equivalencias da súa formación anterior", remarcou. Do mesmo xeito, Feijóo pide que se apoie aos concellos galegos no labor de inventario do material recolleito e almacenado nas diferentes instalacións.
CANALIZAR A AXUDA A TRAVÉS DE VÍAS OFICIAIS
Nesta mesma liña expresouse este mércores o delegado do Goberno, José Miñones, que fixo un chamamento a institucións e cidadanía para canalizar a través das vías oficiais os ofrecementos de solidariedade relacionados con persoas refuxiadas que proceden de Ucraína. "A mellor axuda é dar unha resposta coordinada", sinalou, para evitar "disfuncións" e "duplicidades".
Esta foi unha das necesidades que abordou esta mañá o Comité técnico (Cotega), que constituíu a delegación do Goberno en Galicia co obxectivo de coordinar a resposta das institucións públicas e entidades sociais ás necesidades derivadas desta emerxencia. Este organismo traballa desde este mércores no deseño conxunto de accións humanitarias e na preparación de dispositivos para a chegada masiva de persoas desprazadas desde Ucraína, así como no establecemento dos protocolos operativos necesarios.
140 ATENDIDOS A TRAVÉS DA PRIMEIRA ACOLLIDA
Neste sentido, o representante de Accem Galicia, Daniel Bóveda, destacou que "as iniciativas individuais están a dificultar moito o traballo" tanto de análise para saber as necesidades "específicas" que teñen os refuxiados que chegan a Galicia como para dar garantías e dereito a protección social e internacional. Bóveda afirmou que "a través da primeira acollida" atenderon a 140 persoas en Galicia.
Bóveda pediu "calma" á solidariedade da sociedade e asegurou que "xa haberá tempo e formas diferentes de colaborar". En primeiro lugar, segundo explicou, é importante "detectar" as necesidades debido a que "non existe só unha emerxencia habitacional", senón que precisarán "seguramente" prestación psicolóxica, xurídica ou social, ademais da "barreira idiomática", que esixen asistencia profesional.
365 PROTECCIÓNS TEMPORAIS CONCEDIDAS
Miñones indicou que a Oficina de Asilo do Ministerio do Interior xa concedeu en Galicia 365 proteccións temporais a desprazados pola guerra en Ucraína que buscaron refuxio na comunidade. O representante do Executivo central subliñou que España "ten capacidade" de dar resposta á chegada de refuxiados con 21.000 prazas dispoñibles e catro centros de recepción e acollida que poderán ser ampliables.
