Por E.P. | PONTEVEDRA | 23/03/2022 | Actualizada ás 20:03
Iria Portabales, alumna de 9 anos do CEIP Virxe do Rocío (Vigo), alzouse este mércores co primeiro premio do concurso para promover o xoguete igualitario da Deputación de Pontevedra 'Búscase a Talento', no que obtiveron tamén accésit Mateo Maqueira, 8 anos, e Goro Couso, 8 anos, do CEIP Portonovo (Sanxenxo) e A Pedra (Bueu).
O salón de plenos acolleu a entrega desta primeira convocatoria do certame, na que a presidenta, Carmela Silva, acompañada da responsable de Rede Talento, Laura Seara, enxalzou o papel dos centros educativos, "moi comprometidos coa educación integral".
"Síntome orgullosísima da resposta que tivo o concurso, con máis de 1.400 nenas e nenos de 72 centros de 32 concellos, que mostra que temos uns centros educativos comprometidos coa educación integral", destacou Carmela Silva, que puxo en valor a creatividade das nenas e nenos. "O talento é o único que importa nas persoas, é o que vai construíndo sociedade", dixo.
'Búscase a Talento', dirixido a 3º e 4º de primaria, pretendía remarcar que non hai xoguetes, libros ou xogos diferentes para nenas e nenos, só hai xoguetes para xogar, crear e imaxinar un mundo libre de estereotipos e roles de xénero. Deste xeito as crianzas participantes tiñan que crear a 'Talento', un personaxe feliz, libre, intelixente e con moita creatividade, cunha serie de materiais enviados aos centros educativos pola institución provincial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.