O AVE Madrid-Galicia transportou case 384.000 viaxeiros desde decembro
O número de billetes vendido supera xa o medio millón desde que saíron á venda e ata xullo deste ano.
Por E.P. | SANTIAGO DE COMPOSTELA | 25/03/2022 | Actualizada ás 13:58
Os novos servizos de Alta Velocidade de Renfe entre Galicia e Madrid cumpriron o pasado luns 21 de marzo tres meses de funcionamento con 383.769 viaxeiros transportados desde o pasado decembro, cando comezaron a funcionar.
Estes datos foron facilitados polo Ministerio de Transportes, Mobilidade e Axenda Urbana a través dun comunicado. Respecto das cifras das ligazóns, realizados en Ourense ou Santiago, un total de 20.280 viaxeiros utilizaron durante estes tres meses os servizos que permiten viaxar da Coruña, Santiago, Vigo, Pontevedra, Vilagarcía de Arousa ou Lugo e enlazar con trens con destino ou orixe en Madrid.
Os billetes vendidos desde a inauguración do Ave Ourense-Madrid a finais do ano pasado superan o medio millón, chegando ata os 520.981 ata xullo deste ano. A nova oferta comercial de Renfe levou consigo a ampliación de frecuencias --directas ou mediante ligazón-- entre Galicia e Madrid e unha redución nos tempos de viaxe de entre 54 minutos e unha hora e 44 minutos.
BILLETES INTEGRADOS
O novo servizo, ademais de ofrecer a posibilidade de diferentes opcións de traxecto, permite viaxar desde Galicia a outros destinos do resto de España mediante billetes integrados, isto é, títulos de transporte con ligazón garantida e cunha tarifa inferior á suma dos dous billetes por separado.
Con estes novos servizos de Alta Velocidade, Renfe pasa a operar en 100% dos trens a Galicia con emisións cero xa que todos son eléctricos e ecolóxicos por circular con garantía de orixe renovable, segundo remarca a compañía.
